ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის, დავით ბაქრაძის განცხადებით, ნატო-ს გენერალური მდივნის ხელმძღვანელობით ჩრდილოატლანტიკური საბჭოს საქართველოში ვიზიტი კიდევ ერთი წინ გადადგმული ნაბიჯი იქნება ქვეყნის ევროატლანტიკური ინტეგრაციის უზრუნველსაყოფად.

ამის შესახებ სახელმწიფო მინისტრმა მთავრობის სხდომის დასრულების შემდეგ ჟურნალისტებს აღნიშნა.

მისი თქმით, ჩრდილოატლანტიკური საბჭო საქართველოს მეოთხედ სტუმრობს. მინისტრის განცხადებით, პარტნიორ სახელმწიფოებში მსგავსი პრეცედენტი არ არსებობს.

„ეს რიგით მეოთხე ვიზიტია. ზოგადად პარტნიორ სახელმწიფოებში მსგავსი პრეცედენტი არ არსებობს და ჩვენ ძალიან ვამაყობთ თანამშრომლობის ძალიან მაღალი ხარისხით და იმ მჭიდრო ურთიერთობებით, რომელიც გაგვაჩნია ქვეყანაში, ერთი მხრივ, დემოკრატიული რეფორმების, მეორე მხრივ, თავდაცვისუნარიანობის განმტკიცების და ზოგადად ევროატლანტიკური ინტეგრაციის კონტექსტში. ეს იქნება ძალიან ნაყოფიერი ვიზიტი, რაც კიდევ ერთხელ მიუთითებს იმ მაღალ ინტერესზე, მაღალი ხარისხის თანამშრომლობაზე, რომელიც ჩვენ ალიანსთან გაგვაჩნია და აქედან გამომდინარე, დარწმუნებული ვარ, ეს იქნება კიდევ ერთი მნიშვნელოვანი ნაბიჯი წინ ქვეყნის ევროატლანტიკური ინტეგრაციის უზრუნველსაყოფად“, - განაცხადა დავით ბაქრაძემ.

საქართველოში დღეს ნატო-ს გენერალური მდივნის, იენს სტოლტენბერგის ხელმძღვანელობით, ჩრდილოატლანტიკური საბჭო ჩამოვა.დღესვე თბილისში ჩრდილოატლანტიკური საბჭოს სხდომა გაიხსნება, რომელსაც ნატო-ს გენერალური მდივანი უხელმძღვანელებს. იენს სტოლტენბერგი საქართველოს ხელისუფლების პირველ პირებთან შეხვედრებსაც გამართავს. ის ასევე ჩაატარებს ლექციას სხვადასხვა უმაღლესი სასწავლებლის სტუდენტებისთვის.