„საქართველოს ბანკს“ ახალი გენერალური დირექტორი კახაბერ კიკნაველიძე უხელმძღვანელებს.

როგორც „საქართველოს ბანკში“ აცხადებენ, კახა კიკნაველიძემ შეცვალა მურთაზ კიკორია, რომელიც საქმიანობას საბანკო სექტორს მიღმა განაგრძობს.

მურთაზ კიკორია „საქართველოს ბანკში“ სხვადასხვა წამყვან პოზიციაზე 2008 წლიდან მუშაობდა.

კახა კიკნაველიძემ კი კარიერა „საქართველოს ბანკში“ ფინანსური მენეჯერის თანამდებობაზე 1994 წელს დაიწყო, ხოლო შემდგომ კაპიტალის ბაზრების სფეროში გადაინაცვლა და სხვადასხვა პოზიციაზე UBS-სა და Troika Dialog-ში მუშაობდა. 2008 წლიდან დღემდე კახა კიკნაველიძე „საქართველოს ბანკის“ სამეთვალყურეო საბჭოს წევრის პოსტს იკავებდა. 2011 წლიდან დღემდე ის ასევე იყო საინვესტიციო ჯგუფ „ბიჯეოს“ სამეთვალყურეო საბჭოს წევრი.

კახა კიკნაველიძე ლონდონში არსებული ინვესტიციების მართვის კომპანიის „რიონი კაპიტალ პარტნერსის“ დამფუძნებელი და მმართველი პარტნიორია. როგორც ბანკის პრესსამსახურში აცხადებენ, ამ პოზიციას კიკნაველიძე 2016 წლის ბოლომდე „საქართველოს ბანკის“ გენერალური დირექტორის პოსტზე დანიშვნის გამო დატოვებს.

კახა კიკნაველიძე აცხადებს, რომ მისთვის დიდი პატივია აღნიშნულ თანამდებობაზე დანიშვნა.

„მოხარული ვარ, რომ შესაძლებლობა მეძლევა მოღვაწეობა გავაგრძელო ბანკში, აღმასრულებელ როლში. ვთვლი, რომ საინვესტიციო ჯგუფი „ბიჯეო“, რომლის წევრიცაა „საქართველოს ბანკი“, რეგიონში ერთ-ერთი ყველაზე კარგად მართული ორგანიზაციაა და ჩემთვის პატივია შევუერთდე მის მმართველ გუნდს და ბანკი განვითარების კიდევ უფრო მაღალ საფეხურზე ავიყვანოთ. „საქართველოს ბანკს“, ისევე, როგორც ჩვენს ქვეყანას მთლიანობაში, განვითარების ბევრი შესაძლებლობა აქვს და მე მოუთმენლად ველი მუშაობის გაგრძელებას ჯგუფის სამეთვალყურეო საბჭოსთან, „ბიჯეო ჯგუფისა“ და „საქართველოს ბანკის“ მენეჯმენტსა და თანამშრომლებთან ამ შესაძლებლობების მაქსიმალურად გამოყენებისთვისა და ჩვენი ყველა სტრატეგიული პრიორიტეტის განხორციელებისთვის“,- განაცხადა კახა კიკნაველიძემ.