იტალიაში მყოფი ქართველი მეზღვაურები დახმარებას ითხოვენ. მეზღვაურის, გიორგი კვაჭაძის დედის, თამარ სამიტაშვილის განცხადებით, 52 დღეა თურქული გემი ხმელთაშუა ზღვაშია ბლოკირებული, რომელზეც მხოლოდ 3 ქართველი მეზღვაური დარჩა, რადგანაც ეკიპაჟის წევრებმა და კაპიტანმა ხომალდი მიატოვეს და გაიქცნენ.

მისი თქმითვე, აღნიშნულზე პასუხისმგებლობა უნდა აიღოს იტალიამ.

„მოხდა გემის ბლოკირება. შექმნილი მდგომარეობის გამო ყველა მეზღვაური გაიქცა, კაპიტნის ჩათვლით. ჩემი შვილი და კიდევ ორი ქართველი მეზღვაური დარჩა გემზე, ხელფასიც არ ჰქონდათ აღებული. ჩემი შვილი დაუკავშირდა იტალიაში საქართველოს ელჩს, რომელმაც ძალიან სწრაფად მოახერხა მეზღვაურების სიცილიაში ჩაყვანა და უზრუნველყო მათი საკვებით მომარაგება. ამჟამად გემი დაყადაღებულია. ვფიქრობ, პასუხისმგებლობა უნდა აიღოს იტალიამ. გემზე არის 7 მილიონამდე ტვირთი - მძიმე მეტალი. ოთხი თვეა არ აუღიათ მეზღვაურებს ხელფასი“, - აღნიშნა თამარ სამიტაშვილმა.

საზღვაო ტრანსპორტის საზოგადოებასთან ურთიერთობის სამსახურის უფროსის, ნანუკა აროშიძის ცნობით, მეზღვაურები სიციალიაში უსაფრთხო ადგილზე იმყოფებიან და სასამართლო პროცესს ელოდებიან.

„საზღვაო ტრანსპორტის სააგენტოსა და იტალიის სანაპირო დაცვის ურთიერთთანამშრომლობის შედეგად გემი გადაყვანილ იქნა ნაპირთან. იტალიაში საქართველოს საელჩოს ძალისხმევით კი, მეზღვაურებს საკვების და წყლის პრობლემა არ აქვთ. ეს არის სახელფასო დავა დამსაქმებელსა და დასაქმებულებს შორის“, - განაცხადა ნანუკა აროშიძემ.