დუშეთის მუნიციპალიტეტში წელს მნიშვნელოვანი მსხვილი ინფრასტრუქტურული პროექტები ხორციელდება, რომელთა შესრულებაზეც ჯამში დაახლოებით, 7 მლნ ლარი დაიხარჯება, - აღნიშნული განცხადება Guardian.ge-სთან საუბრისას დუშეთის მუნიციპალიტეტის გამგებელმა, ვაჟა ჩოხელმა გააკეთა.
ჩოხელის ცნობით, პროექტები მთელი მუნიციპალიტეტის მასშტაბით ხორციელდება და ძირითადად სასოფლო გზების, ადმინისტრაციული ცენტრში ქუჩების კეთილმოწყობას, სხვადასხვა თემში ხიდების რეაბილიტაციასა და ნაპირსამაგრი გაბიონების მშენებლობას გულისხმობს.
„ვახორციელებთ ისეთ მნიშვნელოვან პროექტს, როგორიცაა დუშეთის კულტურის სახლის რეაბილიტაცია. მოგახსენებთ, რომ შენობა იყო საშინელ მდგომარეობაში - მოძველებული და დაზიანებული კულისები, მეორე სართულზე წყალი ჩამოდიოდა წვიმის დროს, საერთოდ გასარემონტებელი იყო. რეაბილიტირების შემდეგ კულტურის სახლი თანამედროვე და ახალი ინვენტარით აღიჭურვება. სამუშაოებზე რეგიონული განვითარების ფონდიდან და საკუთარი სახსრებიდან ნახევარი მილიონი ლარი დაიხარჯება. ეს არის გარდამავალი პროექტი და დასრულება მომავალ წელს იგეგმება.
დუშეთში მიმდინარეობს ასევე 18 ქუჩის რეაბილიტაცია. სამუშაოები ხორციელდება საკუთარი სახსრებითა და რეგიონული განვითარების ფონდის დაფინანსებით. ორ ლოტოდ გაყოფილ ღონისძიებებზე 618 000 და 607 000 ლარი დაიხარჯება.
გეტყვით რომ ვახორციელებთ საბავშვო ბაღების რეაბილიტაციას ქცეშეთის ადმინისტრაციულ ერთეულში, ასევე სოფელ ბულაჩაურში.
გაბიონების მოწყობა მიმდინარეობს ჭონქაძის თემში ფოთეს ხევზე. სამუშაოებზე 117 000 ლარი დაიხარჯება. ასევე ანანურში, ჯახისხევის კალაპოტის გაბიონის მოწყობა ხორციელდება. ნაპირსამაგრ სამუშაოებს ვასრულებთ ასევე შატილის თემში, შატილის კოშკებთან მდინარე არღუნზე.
ბოგირების მოწყობა მიმდინარეობს ჭონქაძის თემში ადგილობრივი ბიუჯეტის დაფინანსებით, ასევე ხეობის თემშიც, სადაც ბოგირთან ერთად, გზის მოწყობის სამუშაოებიც ხორციელდება. გრემისხევის თემში ბოგირისა და წყალგამტარის მოწყობა მიმდინარეობს.
ვახორციელებთ მაღაროსკარში ჩარგლიდან მიგრიაულთაში გასასვლელი საცალფეხო ხიდის რეკონსტრუქციას.
რაც შეეხება კონკრეტულად გზების რეაბილიტაციას, ახლა ვმუშაობთ სეთურნისა და ზაქათკარის გზის შეკეთებაზე, ასევე ლაფანაანთკარში ნოკორნა-ძველი ოსების დაზიანებული გზის მონაკვეთის რეაბილიტაციაზე.
მნიშვნელოვან მონაკვეთზე, არდოტიდან ხახაბომდე გზის გაწმენდა-გაფართოება მიმდინარეობს - ტექნიკა მუშაობს“, - განუცხადა Guardian.ge-ს დუშეთის მუნიციპალიტეტის გამგებელმა.
(ვაჟა ჩოხელი, დუშეთის მუნიციპალიტეტის გამგებელი)
ჩოხელის თქმით, მუნიციპალიტეტში რამდენიმე მნიშვნელოვანი პროექტი უკვე დასრულდა, მათ შორის, ბაზალეთში ხიდების მოწყობა.
„ლაზვიანთაში და საშაბუროში სტიქიამ დააზიანა სახიდე გადასასვლელები. ცენტრალური ბიუჯეტიდან გამოიყო 354 000 და 442 000 ლარი ამ სამუშაოების შესასრულებლად. ხიდები აღდგენილია, ტრანსპორტი უკვე მოძრაობს. ერთ-ერთი დასრულებული პროექტია ასევე ჭოპორტში სკოლასთან გზის მოასფალტება“, - განაცხადა ვაჟა ჩოხელმა და დაამატა, რომ უახლოეს პერიოდში იწყება ასევე მნიშვნელოვანი ინფრასტრუქტურული პროექტი, რომელიც უკანა ფშავში, სოფელ შუაფხოში სკოლის მიმდებარე ტერიტორიაზე ნაპირსამაგრების მოწყობას გულისხმობს.
მოგესალმებათ საინფორმაციო სააგენტო GUARDIANGE-ის ადმინისტრაცია და გაცნობებთ, რომ სააგენტოს განახლების შედეგად, ამიერიდან ვებგვერდის ძველ ვერსიაზე -WWW.GUARDIAN.GE ხელმისაწვდომი იქნება 2023 წლის 7 სექტემბრამდე განთავსებული საინფორმაციო ხასიათის წერილობითი/ფოტო/ვიდეო მასალა, ხოლო განახლებული სააგენტოს ვებგვერდს შეგიძლიათ გაეცნოთ WWW.GUARDIANGE.COM-ზე.
ამერიკის შეერთებული შტატების არჩეულმა პრეზიდენტმა დონალდ ტრამპმა ჯანდაცვისა და სოციალური მომსახურების მდივნად ვაქცინაციის მიმართ სკეპტიკურად განწყობილი რობერტ ფიცჯერალდ კენედი უმცროსი, პრეზიდენტ ჯონ კენედის ძმისშვილი დაასახელა, რითაც დაასრულა დიდი ხნის მითქმა-მოთქმა კენედის გარშემო იმის შესახებ, თუ რა თანამდებობას დაიკავებდა იგი ტრამპის ადმინისტრაციაში.