ის, რომ რუსეთმა მოახერხა, რაც მოახერხა, ამაში ლომის წვლილი სააკაშვილს და „ნაციონალურ მოძრაობას“ ეკუთვნით. რომ არა მათი უაზრო მოქმედებები, რომ არა ჩვენი საკუთარი ხელისუფლების გაუაზრებელი ქმდებები, არაფერიც არ მოხდებოდა და რუსეთი ჯარს ვერ შემოიყვანდა, - განაცხადა ყოფილმა პრემიერ მინისტრმა, ბიძინა ივანიშვილმა ზუგდიდში ადგილობრივ მედიასთან შეხვედრისას.

ივანიშვილის აზრით, აუცილებელია, "ნაცვლად იმისა, რომ მეზობელი სახელმწიფოების დახასიათება დავიწყოთ და ვცადოთ, როგორმე მათ გემოვნება, მადა ან სტრატეგია შევუცვალოთ, უმჯობესია ვიფიქროთ სწორი ხელისუფლება შევარჩიოთ და სწორად ვმართოთ ქვეყანა".

„ძალიან ხშირად ხდება, არა მარტო ჩვენ რეგიონში, რომ მეზობელი ქვეყნის ტერიტორიებს ეხება. მთავარი, რაც ჩვენ კარგად უნდა გავიაზროთ არის ის, რომ სწორად შევარჩიოთ ხელისუფლება. ქვეყანას პატრონი უნდა ჰყავდეს, გააზრებული პატრონი, ვისაც შეუძლია მართვა.... 

რა თქმა უნდა, ოკუპირებულია ტერიტორიები და ათასჯერ მითქვამს, რომ ურთიერთობის დალაგება, რომელსაც რუსეთთან ვცდილობთ, ვერ გადაწყდება დანაკარგების ხარჯზე. აქაც ის პასუხი იქნება, რომ სწორად ავირჩიოთ ხელისუფლება. ვერც ერთ ჩვენს მეზობელს და შორეულ სახელმწიფოს ვერ შევუცვლით ქმედების მანერას“,- განაცხადა ივანიშვილმა.