პარტიის „თოფაძე - მრეწველები ჩვენი სამშობლოს“ ლიდერის, გოგი თოფაძის განცხადებით, მათ ცენტრალურ საარჩევნო კომისიაში (ცესკო) პარტიული სია წარადგინეს.

აღნიშნულით თოფაძე ცესკო-ს მიერ გავრცელებულ ინფორმაციას გამოეხმაურა, რომლის თანახმადაც, „მრეწველებს“ პარტიული სია არ წარუდგენია, რის გამოც რეგისტრაცია გაუუქმდება.

„დოკუმენტები ჩაბარებული გვაქვს, წარვადგინეთ, რაღაც გარკვეული გაუგებრობა მოხდა იქ. საბუთიც გვაქვს, რომ ჩვენ მივიტანეთ დროზე. გაირკვევა ალბათ ძალიან მალე“,-განაცხადა გოგი თოფაძემ ტელეკომპანია „რუსთავი 2“-თან.

ცესკო-ს თავმჯდომარის, თამარ ჟვანიას თქმით, პარტიული სიის წარმოუდგენლობა გახლავთ რეგისტრაციის გაუქმების საფუძველი და ის შესაბამის გადაწყვეტილებას მიიღებს.

„როდესაც შემოწმდა, მათ მიერ წარმოდგენილი ბაინდერი, სააღრიცხვო ბარათები, დოკუმენტი და წერილი, რომელიც შემოიტანეს, ამ დოკუმენტაციას პარტიული სია არ ახლდა. საარჩევნო კოდექსით, პარტიული სიის წარმოუდგენლობა გახლავთ რეგისტრაციის გაუქმების საფუძველი და ცენტრალური საარჩევნო კომისიის თავმჯდომარე მიიღებს კანონით დადგენილ გადაწყვეტილებას“,-განაცხადა თამარ ჟვანიამ.

როგორც Guardian.ge-ს „მრეწველების“ ერთ-ერთმა წევრმა, დეპუტატმა, თამაზ ყაჭეიშვილმა განუცხადა, პარტიას ცესკო-ში საარჩევნო სია ჰქონდა წარდგენილი.

„არ ვიცი ვინ გაავრცელა ეს ინფორმაცია. რა სისულელეა, საარჩევნო სია გვქონდა“,-განაცხადა მან.

ამ წუთებში პარტიის წარმომადგენლები ცესკო-ში არიან შეკრებილები. მათი მტკიცებით, პარტიას დოკუმენტაცია სრულად აქვს წარდგენილი და "მრეწველების" რეგისტრაციიდან მოხსნის საფუძველი არ არსებობს.