„აშშ-ის კონგრესის მიერ საქართველოს ტერიტორიული მთლიანობის მხარდამჭერმა რეზოლუციამ ძალიან დიდი მხარდაჭერა მოიპოვა ჩვენი აქტიური მუშაობითაც“,-განაცხადა საქართველოს საგარეო საქმეთა მინისტრმა, მიხეილ ჯანელიძემ ჟურნალისტებთან საუბრისას.

მისი შეფასებით, კონგრესის მიერ მიღებული რეზოლუცია ხაზს უსვამს აშშ-ს პოლიტიკაში საქართველოსადმი დიდ ინტერესს.

საგარეო საქმეთა მინისტრმა მადლობა გადაუხადა კონგრესმენებს - ტედ პოსა და ჯერარდ კონელის, რომლებიც საქართველოს მეგობრობის ჯგუფის თანათავმჯდომარეები არიან.

„არაერთი ვიზიტი განხორციელდა, რათა მიგვეწოდებინა სრულყოფილი ინფორმაცია, თუ რა მდგომარეობაა დღეს საქართველოში. შესაბამისად, 33-მა კონგრესმენმა გამოთქვა ამ რეზოლუციის სპონსორობის სურვილი და შემდეგ უკვე 410 მხარდამჭერი ხმით გავიდა. ეს ხაზს უსვამს საქართველოსადმი დიდ ინტერესს ამერიკის შეერთებული შტატების პოლიტიკაში, სადაც აქტიურად განიხილება ყველა ის პრობლემატიკა, რომელიც საქართველოს დღეს აქვს; აქტიურად განიხილება აშშ-სა და საქართველოს შორის სტრატეგიული თანამშრომლობის საკითხები და ხაზგასმულია, რომ კიდევ უფრო უნდა გაღრმავდეს ეს თანამშრომლობა“,-განაცხადა საგარეო საქმეთა მინისტრმა.

მიხეილ ჯანელიძემ ასევე აღნიშნა, რომ რეზოლუციაში ასევე ხაზგასმულია და გამოხატულია აშშ-ს მტკიცე პოზიცია, რომ ის არასდროს არ აღიარებს საქართველოს ოკუპირებულ ტერიტორიებს.

„ასევე, ხაზგასმულია თანამშრომლობის საჭიროება თავდაცვის და უსაფრთხოების სფეროში და საქართველო განხილულია, როგორც ამერიკის გრძელვადიანი ინტერესის ქვეყანა, რათა მიღწეულ იქნას სტაბილურობა და უსაფრთხოება.არამარტო აშშ-ს ადმინისტრაცია, არამედ კონგრესი ორპარტიულ მხარდაჭერას გამოხატავს საქართველოსთვის, რაც ძალიან მნიშვნელოვანია სტრატეგიული თანამშრომლობის სამომავლოდ გაღრმავებისთვის“,-განაცხადა ჯანელიძემ.