მოძრაობის „სახელმწიფო ხალხისთვის“ ლიდერის, პაატა ბურჭულაძის განცხადებით, პარტიის სია საქმის მკეთებელი კადრებით დაკომპლექტდა.

აღნიშნულით პაატა ბურჭულაძე მისი პარტიის უკვე ყოფილი წევრის, ხათუნა ლაგაზიძის ბრალდებებს ეხმაურება.

მოძრაობის ლიდერი პარტიაში კრიმინალური მენტალიტეტის მქონე ადამიანების არსებობას გამორიცხავს.

„განრისხება, რომელიც ქალბატონმა ხათუნამ გამოიჩინა ჩემთვის მოულოდნელი არ ყოფილა, თუმცა მან იცოდა ეს, იმიტომ, რომ ჩვენ ყველამ გუნდურად განვიხილეთ და შევთანხმდით, რომ ჩვენი პრიორიტეტია პარლამენტში შევიდნენ საქმის მკეთებლები და არა მოლაპარაკეები, იმიტომ რომ მოლაპარაკე ისედაც ძალიან ბევრია პარლამენტში, ხოლო როგორ გაკეთდეს საქმე არ იციან“,-აღნიშნა პაატა ბურჭულაძემ.

პაატა ბურჭულაძემ ასევე განაცხადა, რომ მან აპატია ხათუნა ლაგაზიძეს და მისივე თქმით, რამდენიმე დღეში ლაგაზიძეს წყენა გადაუვლის და ინანებს საკუთარ საქციელს.

ბურჭულაძემ საკუთარი გუნდის წევრებსაც მიმართა, რომ მათაც აპატიონ ხათუნა ლაგაზიძეს.

„მე ვაპატიე ხათუნა ლაგაზიძეს. რამდენიმე დღეში ლაგაზიძეს წყენა გადაუვლის და ინანებს საკუთარ საქციელს. მე ვთხოვ ჩემი გუნდის წევრებსაც, რომ აპატიონ და დანარჩენი ღმერთმა შეუნდოს“,-განაცხადა  პაატა ბურჭულაძე.

მოძრაობა „სახელმწიფო ხალხისთვის“ ხათუნა ლაგაზიძემ ორი დღის წინ დატოვა. მისი თქმით, პაატა ბურჭულაძე ამერიკაში გაქიცა და პარტიის სიის ჩამოყალიბება პავლე კუბლაშვილს მიაბარა. ლაგაზიძემ ასევე აღნიშნა, რომ „ბურჭულაძის პირადი არჩევანია „ნაციონალების“ სია“.