ბაღდათის გამგებელი ირაკლი გეგეშიძე, 230 000 ლარის გირაოს გადახდის სანაცვლოდ წინასწარი პატიმრობიდან გაათავისუფლეს.

ბაღდათის საკრებულოს თავმჯდომარის, გრიგოლ მაჩიტაძის თქმით, ირაკლი გეგეშიძე ამჟამად ბიულეტენზეა, ამიტომ ის, ჯერჯერობით ვერ დაუბრუნდება თავის პოსტს.

ირაკლი გეგეშიძის დაკავების შემდეგ, მუნიციპალიტეტის გამგებლის მოვალეობას მისი პირველი მოადგილე გელა მშვილდაძე ასრულებს.

თვითმმართველობის შესახებ კოდექსის #56-ე მუხლის მიხედვით, თანამდებობის პირს, მას შემდეგ, რაც შეუწყდება აღკვეთის ღონისძიების სახით პატიმრობა, ის დაკავებულ თანამდებობას უნდა დაუბრუნდეს.

ირაკლი გეგეშიძის განმარტებით, სასამართლომ გაითვალისწინა მისი არგუმენტები.

„გირაო შევთავაზე და ამჟამად დამეთანხმა მოსამართლე. ჩათვალეს, რომ გავლენას ვერ მოვახდენ მოწმეებზე. მზად ვარ გადავდგე თანამდებობიდან, რომ გავლენა არ ვიქონიო თანამშრომლებზე. 227 ათასი ლარის არასწორად გადარიცხვას მედავება სათანადო ორგანოები. მე წარვადგინე ჩემი არგუმენტები, საბუთები და ძალიან დიდი იმედი მაქვს, რომ დავამტკიცებ“, - განაცხადა ირაკლი გეგეშიძემ.

ირაკლი გეგეშიძე მიმდინარე წლის 25 აპრილიდან პატიმრობაში იმყოფებოდა. დაკავებულ გამგებელს სასამართლო უწყება ბაღდათი-საკრაულას სამკილომეტრიანი გზის სარეაბილიტაციოდ გამოყოფილი თანხის გაფლანგვას და სამსახურეობრივი უფლებამოსილების ბოროტად გამოყენებას ედავება.