"მე ისიც კი მქონდა იდეად და გუშინაც ვსაუბრობდი ამ თემაზე, რომ იქნებ, მოვახერხოთ რომ ადგილობრივები არ შევუშვათ ამ კაზინოებში - ალბათ, ეს კანონმდებლობასთან შეუთავსებლობაში მოვა", - განაცხადა საქართველოს ყოფილმა პრემიერ მინისტრმა, ბიძინა ივანიშვილმა ქუთაისში, რეგიონულ მედიასთან შეხვედრისას.

ივანიშვილი მიიჩნევს, რომ არასრულწლოვანთათვის აზარტულ თამაშებზე მკაცრი შეზღუდვები უნდა დაწესდეს. თუმცა, აქვე აღნიშნავს, რომ ბევრი ტურისტი ჩამოდის და კაზინოების არსებობა ტურსტების დინებასაც უწყობს ხელს. ივანიშვილის აზრით, გამოსავალი არის ის, რომ "ამ მხრივ კანონმდებლობები გავამკაცროთ, მაგრამ ბიზნესზე უარს ვერ ვიტყვით".

"მართალი, რომ გითხრათ, მე სიამოვნებით ავკრძალავდი, მაგრამ ესეც ეკონომიკაა და მკვეთრი დამოკიდებულება ამაზე თურმე არ შეიძლება. განსაკუთარებით, აჭარაში, ბათუმში, ამას სერიოზული პოზიცია უჭირავს, როგორც ბიზნესს და ქვეყნის განვითარებაში ამასაც თავისი ადგილი აქვს. სასტიკად უნდა გამკაცრდეს იქ არასრულწლოვნების მისვლა. არ დაგიმალავთ, მე ისიც კი მქონდა იდეად და გუშინაც ვსაუბრობდი ამ თემაზე (ვისთან ამას არ გავყვები), რომ იქნებ ის მოვახერხოთ, რომ ადგილობრივები არ შევუშვათ ამ კაზინოებში. ალბათ, ეს კანონმდებლობასთან შეუთავსებლობაში მოვა.

ეს ფაქტია და ამას ვერ უარვყოფთ. აქვს თავისი წვლილი და როლი კაზინოებს. თუ რამეს კანონმდებლობაში მოვიფიქრებთ და მაქსიმალურად გავამკაცრებთ. უამრავი ოჯახი გაუბედურდა. მეც ვიცი ეს რა არის. მე მახსოვს, როდესაც ერდოღანთან მქონდა შეხვედრა, პირველი ეს მთხოვა, იქნებ კაზინოები დახუროო. იქედანაც ჩამოსულებიც ძალიან ბევრი უბედურდება ამ კაზინოებში. მაგრამ რა ვქნათ, ბიზნესის სახეა ეს. ხალხს ეს უყვარს და მოსწონს. ტურიზმს ხელს უწყობს, შესაბამისად, კანონმდებლობას უნდა მივხედოთ. კატეგორიული კანონები უნდა შემოვიღოთ არასრულწლოვნებზე, უნდა დაუხურო და გააკოტრო პირდაპირ, ვინც არასრულწლოვანს შეუშვებს, დაარღვევს, პასპორტები უნდა მოსთხოვონ. ამ მხრივ კანონმდებლობები გავამკაცროთ, მაგრამ ბიზნესზე უარს ნუ ვიტყვით”, - განაცხადა ივანიშვილმა.