საქართველოს ყოფილმა პრემიერ მინისტრმა ბიძინა ივანიშვილმა პაატა ბურჭულაძის პოლიტიკურ მოძრაობას და მასთან ერთ ბლოკად გაერთიანებულ "გირჩს", ვაშაძის პარტიას და მამუკა კაციტაძის "ახალ მემარჯვენეებს" "ნაციონალური მოძრაობის" და მიხეილ სააკაშვილთან ალიანსში დასდო ბრალი. მან ამ კონტექსტში "ახალი მემარჯვენეების" ყოფილი ლიდერის, დავით გამყრელიძის პოლიტიკიდან წასვლის მიზეზიც განმარტა და აღნიშნა, რომ ერთადერთი პოლიტიკური პარტია, რომელიც დღეს "ნაციონალური მოძრაობის" შემადგენელ ნაწილად დარჩა, "ლეიბორისტული პარტიაა", რადგან მისი თქმით, "ნათელაშვილს წასასვლელი არსად არ ჰქონდა იმიტომ, რომ მაგაზე კომპრომატები აქვთ უამრავი და დღესაც ამუშავებენ მაგას ისევ “ნაცები”.

"თუ გახსოვთ თქვენ გამყრელიძემ პოლიტიკა დატოვა მხოლოდ იმ ნიშნით, რომ ლამის მთელმა საზოგადოებამ გაიგო, რომ “ახალი მემარჯვენეები” იყვნენ ფსევდო ოპოზიციური პარტია და ეს იყო “ნაციონალური მოძრაობის” შემადგენელი ნაწილი. დღეს ერთადერთი ასეთი დარჩა “ლეიბორისტული პარტია” და იქედან დანარჩენები, “ქრისტიან–დემოკრატებმაც” ნახა რომ ყველა საფუძველი გამოეცალა, ჩაიშალა და ნათელაშვილს წასასვლელი არსად არ ჰქონდა იმიტომ, რომ მაგაზე კომპრომატები აქვთ უამრავი და დღესაც ამუშავებენ მაგას ისევ “ნაცები”, კაციტაძეც იყო “ნაციონალური მოძრაობის” წევრი ჩვეულებრივად და ამაზე ბუნებრივი გაერთიანება რა შეიძლებოდა, რომ ყოფილიყო. ეს ვთქვათ, ასეთი ჩახლართული სიტუაციები და ამისი ხელწერა გახლავთ სააკაშვილის, ყოველთვის ცდილობდა საზოგადოების მოტყუებას. მადლობა ღმერთს, რომ ეს კარგად გაირკვა", - განაცხადა ბიძინა ივანიშვილმა.