საქართველოს პრეზიდენტმა, გიორგი მარგველაშვილმა საფრანგეთის რესპუბლიკის თავდაცვის მინისტრი ჟან-ივ ლე დრიანი „ოქროს საწმისის“ ორდენით დააჯილდოვა.

პრეზიდენტის ადმინისტრაციის ცნობით, საფრანგეთის თავდაცვის მინისტრს ორდენი თავდაცვის სფეროში ორმხრივი ურთიერთობების გაღრმავებაში შეტანილი მნიშვნელოვანი წვლილისთვის გადაეცა. როგორც გიორგი მარგველაშვილმა განაცხადა, საფრანგეთი საქართველოს ევროპულ და ევროატლანტიკური ინტეგრაციის მტკიცე მხარდამჭერი და ძლიერი პარტნიორია.

„ჩვენთვის უაღრესად მნიშვნელოვანია საფრანგეთის დახმარება თავდაცვისუნარიანობის გაძლიერების კუთხით. მინდა გამოვყო საფრანგეთის თავდაცვის მინისტრის წვლილი ჩვენს ქვეყნებს შორის თანამშრომლობის გაძლიერებაში და თავდაცვის სფეროში გაწეული დახმარებისთვის. მისი უშუალო მხარდაჭერით ხორციელდება ის მნიშვნელოვანი პროექტები, რომლებიც აძლიერებს ჩვენი ქვეყნის უსაფრთხოებას“, - განაცხადა გიორგი მარგველაშვილმა და პირადად მისი და ქართველი ხალხის სახელით ჟან - ივ ლე დრიანს მადლობა გადაუხადა.

საფრანგეთის თავდაცვის მინისტრმა აღნიშნა, რომ ოქროს საწმისის ორდენით დაჯილდოებას მეგობრული ურთიერთობების გამოხატულებად აღიქვამს.

„მე ვაცნობიერებ, რომ სამხედრო თანამშრომლობა ამ ჟესტით არის პატივმიგებული და არის მომავალი წლებისთვის მოტივაცია. საფრანგეთი დიდ მნიშვნელობას ანიჭებს საქართველოსთან თანამშრომობას. გამიგია, რომ იაზონი და არგონავტები საქართველოში სწორედ ოქროს საწმისისთვის ჩამოვიდნენ. მე არ მაქვს პრეტენზია ლეგენდაში შევიდე, მაგრამ ის სამი დღე, რომელიც ჩემ მეგობარ ლევან იზორიასთან და შეიარაღებულ ძალებთან გავატარე, მუდამ დარჩება ჩემი და ჩემი თანამშრომლების მეხსიერებაში“, - განაცხადა ჟან - ივ ლე დრიანმა.

დღესვე საფრანგეთის თავდაცვის მინისტრმა ქართველი სამხედროები საფრანგეთის რესპუბლიკის ეროვნული თავდაცვის ბრინჯაოს მედლით დააჯილდოვა.

მეორე დონის უმაღლეს სამხედრო განათლებაში მიღებული ბრწყინვალე შედეგები „სამთო“ სფეროში ეფექტური თანამშრომლობისთვის, საფრანგეთის ეროვნული თავდაცვის ბრინჯაოს მედლით ვიცე-პოლკოვნიკი ვასილ კოპეიკინი დაჯილდოვდა. ავღანეთსა და ცენტრალურ აფრიკაში ფრანგი თანამებრძოლების გვერდიგვერდ სამშვიდობო ოპერაციებში მონაწილეობისთვის კი მაიორი ვახტანგ დიასამიძე, კაპიტანი ლევან კახიძე და კაპიტანი ელდარ მამრიკიშვილი დაჯილდოვდნენ.