"დიახ, ბატონებო, გილოცავთ - თქვენ დაამარცხეთ არა "ნაციონალური მოძრაობა", თქვენ სამწუხაროდ დაამარცხეთ ქართველი ხალხი", - ასე უპასუხა "ერთიანი ნაციონალური მოძრაობის" წარმომადგენელმა, აკაკი ბობოხიძემ "ქართული ოცნებისა" და "რესპუბლიკური პარტიის" წევრების კრიტიკას "რუსთავის 2"-ის გადაცემა "არჩევანში" სტუმრობისას.

ბობოხიძემ ოპონენტებს კოალიციის წევრობის დროს გაცემული შეუსრულებელი დაპირებები გაახსენა და მათზე პასუხისმგებლობის აღება მოსთხოვა.

„როგორც კი "ქართული ოცნების" კოალიციის წევრებს შეახსენებთ იმ დაპირებებს, რომელიც არ შესრულებულა, იმ წუთში აქვთ მზამზარეული პასუხი, რომ ეს კოალიცია შეიქმნა მხოლოდ ერთი მიზეზით რათა დაემარცხებინათ "ნაციონალური მოძრაობა". დიახ, ბატონებო გილოცავთ, თქვენ დაამარცხეთ არა "ნაციონალური მოძრაობა", არამედ სამწუხაროდ, დაამარცხეთ ქართველი ხალხი და დაამარცხეთ, მათ შორის, იპოთეკით დაზარალებული ადამიანები.

თქვენ ყველანი ერთად ამ ადამიანებს ჰპირდებოდით, რომ ექნებოდათ 3%-იანი მაქსიმუმ სესხები 10, 15 და 20-წლიანი და თქვენი ლიდერი ამბობდა, რომ ის თავისი ჯიბიდან დააფინანსებდა ამ პრობლემის მოგვარებისთვის საჭირო თანხებს. ამ ადამიანების წინაშე პასუხისმგებლები ხართ სწორედ თქვენ. ერთადერთი რაც ამ ადამიანებს უშველის, არადა ამ ადამაიანებზე აუცილებლად უნდა იფიქროს სახელმწიფომ, იმიტომ რომ სახელმწიფო რომელიც შედგება უსახლკარო მოქალაქეებისგან, უბრალოდ ვერ იქნება შემდგარი სახელმწიფო. ამიტომ ამ პრობლემაზე გვინდა თუ არ გვინდა, ჩვენ მოგვიწევს ფიქრი. ოღონდ ამაზე ფიქრო მოუწევს იმ ხელისუფლებას, რომელიც უზრუნველყოფს ქვეყნის წინსვლას. ერთ-ერთი გამოსავალი არის ის, რომ ეს ადამიანები დასაქმდნენ, ეს ადამიანები წარმატებული ეკონომიკის მქონე ქვეყნის მოქალაქეები და რამენაირად შეძლონ სესხზე მომსახურება", - განაცხადა აკაკი ბობოხიძემ.