"მე მინდა მივმართო ოპონენტებს, ამ შემთხვევაში ”ქართული ოცნების” ლიდერებს, ვიკამათოთ და ნუ გვექნება ყველაფერი აგებული სიცრუეზე და თუ სხვა ვერაფერს მიძებნით ნაკლს, მაშინ გამოდით და ასე თქვით ბატონებო”, - აცხადებს "საქართველოს პარლამენტის თავმჯდომარე, "რესპუბლიკური პარტიის" ლიდერი დავით უსუფაშვილი.

უსუფაშვილი ყოფილი პრემიერ მინისტრის, ბიძინა ივანიშვილის გუშინ ქუთაისში, რეგიონულ მედიასთან შეხვედრისას გაკეთებულ განცხადებას ეხმაურება. ივანიშვილის შეფასებას, რომ საკონსტიტუციო კომისიის თავმჯდომარის პოსტზე უსუფაშვილს "თითი თითზე არ დაუდია", პარლამენტის თავმჯდომარე ასე პასუხობს:

”მე ჯერ კიდევ მინდა მჯეროდეს, რომ იგი არის მსხვერპლი არასწორად მიწოდებული ფაქტების, ინტერპრეტაციების და თავად შეგნებულად არ ახდენს სიცრუის ტირაჟირებას. ჩვენ, პოლიტიკოსებმა შეიძლება ბევრი რამ ვარგოთ ქვეყანას, მაგრამ შეიძლება ვავნოთ კიდეც და ქვეყნისთვის ვნების ყველაზე მოკლე გზაა, როცა ჩვენი სიტყვები უფასურდება. მე არ მინდა, რომ პოლიტიკოსების და მათ შორის ბიძინა ივანიშვილის სიტყვები უფასურდებოდეს იმ ტიპის არასწორი ფაქტების ტირაჟირებით, რომელიც გუშინ მოვისმინეთ. ეს ეხებოდა კონკრეტულად სახელმწიფო საკონსტიტუციო კომისიას და მის მუშაობას, მისი მუშაობის პროცესში ჩემი რა „რესბუპლიკელების“ წვლილს. ჩვენ მოვისმინეთ, რომ თითი თითზე არ დაგვიდია და თურმე ჩვენი ბრალია, რომ საქართველოში პრეზიდენტი პირდაპირი წესით აირჩევა. მე ძნელად წარმომიდგენია, უფრო უსაფუძვლო და თითიდან გამოწოვილი ბრალდებები. მე მინდა მივმართო ოპონენტებს, ამ შემთხვევაში ”ქართული ოცნების” ლიდერებს, ვიკამათოთ და ნუ გვექნება ყველაფერი აგებული სიცრუეზე და თუ სხვა ვერაფერს მიძებნით ნაკლს, მაშინ გამოდით და ასე თქვით ბატონებო”, - აცხადებს უსუფაშვილი.