პარტიული ნიშნით სტიგმატიზაცია უხერხულია იმ პარტიის წევრის მხრიდან, რომლის სიის მიმართაც არაერთი შეკითხვა გაჩნდა, - ასე პასუხობს პრეზიდენტის პრესსპიკერი ეკა მიშველაძე მანანა კობახიძის განცხადებას, რომ ვანო მაჭავარიანს „ნაციონალებთან“ მჭიდრო კავშირები აქვს და უშიშროების საბჭოს მდივნის პოსტზე, ალბათ, უფრო სტაბილურ და გაწონასწორებულ პიროვნებას უნდა მიენიჭოს უპირატესობა.

„უმჯობესი იქნება, თუ არჩევნებამდე დარჩენილ ამ მოკლე პერიოდში, პოლიტიკოსები ამომრჩევლებთან საკუთარი პროგრამის გაცნობით დაკავდებიან. რაც შეეხება პარტიული ნიშნით სტიგმატიზაციას, მიგვაჩნია, რომ ეს ცოტა უხერხულია იმ პარტიის წევრისგან, რომლის სიის მიმართაც არაერთი კითხვა გაჩნდა და დაისვა საზოგადოებაში“, - განაცხადა ეკა მიშველაძემ.

მიშველაძის თქმით, ვანო მაჭავარიანი არც ერთი პარტიის წევრი არ ყოფილა. ის ძალიან მაღალი კვალიფიკაციის პროფესიონალია და უშიშროების საბჭოს მდივნის მოადგილის პოსტს იკავებს.