ტელეკომპანია "რუსთავი 2“-ის გენერალური დირექტორის, ნიკა გვარამიას განცხადებით, ხელისუფლებამ კიდევ ერთხელ ამცნო საზოგადოებას, რომ ის ისმენს სატელეფონო საუბრებს.

ამის შესახებ გვარამიამ დღეს გამართულ ბრიფინგზე განაცხადა, სადაც მისი და მოძრაობის „სახელმწიფო ხალხისთვის“ ლიდერის, პაატა ბურჭულაძის სატელეფონო საუბრის ამსახველი აუდიოჩანაწერის გავრცელებას გამოეხმაურა.

„ამ საუბარში სკანდალური არაფერია, გარდა იმისა, რომ ხელისუფლებამ კიდევ ერთხელ, მორიგ ჯერზე, განსაკუთრებული სითავხედით, არჩევნებამდე ორი კვირით ადრე გვამცნო, რომ ის დიახაც გვისმენს,  რომ დიახაც იყენებს ჩვენს საუბრებს საკუთარი პოლიტიკური მიზნებისთვის და ამას ასაჯაროებს, რაც ყველაზე უფორ ტრაგიკული და ამაზრზენია ამ ყველაფერში“,-განაცხადა გვარამიამ.

ნიკა გვარამიას და პაატა ბურჭულაძის სატელეფონო ჩანაწერი youtube-ზე  მიმდინარე წლის 13 სექტემბერს გამოქვეყნდა და მისი ავტორია Creative Georgia News-ი.    

ჩანაწერის ნამდვილობას ნიკა გვარამია ადასტურებს და აცხადებს, რომ პაატა ბურჭულაძესთან სპეციალურად ღია ხაზზე დარეკა და მის გამოსაქვეყნებლად სახელმწიფო უსაფრთხოების (სუს) სამსახურს 3 დღეც არ დასჭირდა.        

სახელმწიფო უსაფრთხოების სამსახური (სუს) ნიკა გვარამიას და პაატა ბურჭულაძის სატელეფონო საუბრის ამსახველი  ჩანაწერის მოპოვებასთან და გავრცელებასთან რაიმე კავშირს უარყოფს და აცხადებს, რომ აღნიშნულ ფაქტზე შსს-მ გამოძიება დაიწყო.       

სატელეფონო საუბრისას გვარამია ბურჭულაძისგან ივანიშვილთან შესაძლო გაერთიანების გამო პასუხს ითხოვს.