ტელეკომპანია "რუსთავი2"–ის გენერალური დირექტორის, ნიკა გვარამიას განცხადებით, 2016 წლის 8 ოქტომბერი იქნება არა არჩევნები, არამედ "რეფერენდუმი" და იგი მოუწოდებს საზოგადოებას წავიდნენ ამ რეფერენდუმზე და შემოხაზონ ნებისმიერი პოლიტიკური ძალა, გარდა 41–ისა, "ქართული ოცნებისა". აღნიშნულ თემაზე გვარამიამ საგანგებო ბრიფინგზე ისაუბრა. მისი თქმით, ფარული მოსმენებისა დ თვალთვალის გამო ბიძინა ივანიშვილი უნდა გასამართლდეს.

"ეს ძალა საქართველოს ღუპავს, მიაქანებს უფსკრულში და ამას აკეთებს განსაკუთრებული სისასტიკით, ცინიზმით და თავხედობით. ეს არის ბიძინა ივანიშვილის მანიაკალური ბოდვებით შეპყრობილი ადამიანის პროექტი, რომლის მთავარი სიამოვნება ამ ცხოვრებაში, მათ შორის ხორციელი, მთავარი სიამოვნება, ეს არის სხვა ადამიანების თვალთვალი, მოსმენა და ამაზე უკაცრავად და "კაიფი". არ შეიძლება, ესეთი, ავადმყოფურად შეპყრობილი ადამიანი მართავდეს ქვეყანას და სწორედ ის მართავს ქვეყანას. ის უნდა წავიდეს 8 ოქტომბრის რეფერენდუმის შედეგად, და არა მხოლოდ წავიდეს, არამედ ამ ყველაფრისთვის გასამართლდეს. ყველა დანარჩენი არის მარიონეტი და შემსრულებელი და მე არა ვარ მომხრე, ეს ადამიანები, რომლებიც თვითონ მსხვერპლი არიან ბიძინა ივანიშვილის მანიაკალური რეჟიმის, მიეცნენ სისხლის სამართლის პასუხისმგებლობაში, მაგრამ ამ ყველაფრის შემოქმედი ძალიან მძიმედ უნდა დაისაჯოს და ყველამ უნდა ნახოს, რომ მსგავსი დანაშაულობებისთვის, ადამიანების ცხოვრების ჯოჯოხეთად ქცევისთვის, ისჯებიან და არავის არ უნდა გაუჩნდეს სურვილი, რომ ეს ოდესმე გაიმეოროს", – განაცხადა ნიკა გვარამიამ.