ხონის მუნიციპალიტეტში მასშტაბური ინფრასტრუქტურული პროექტები ხორციელდება, - აღნიშნული განცხადება Guardian.ge-სთან საუბრისას ხონის მუნიციპალიტეტის გამგებელმა, ჯემალ მებუკემ გააკეთა.

მისი თქმით, ყველაზე მნიშვნელოვანი რაც ამ ეტაპზე ხორციელდება, ქალაქ ხონის გაზიფიცირებაა. გამგებლის ცნობით, პროექტი, რომელიც ბუნებრივი აირით უზრუნველყოფას გულისხმობს, ორეტაპიანია. წლის ბოლომდე ქალაქის 2 000-მდე ოჯახი დაიწყებს ბუნებრივი აირით სარგებლობას, სრული დაფარვა, ანუ 4 000 ოჯახის აბონირება კი მომავალ წელს დასრულდება.

„ყველაზე დიდი პროექტი ამ ეტაპზე ქალაქ ხონის გაზიფიცირებაა. უკვე დავასრულეთ მაგისტრალის გაკეთება და ახლა მიმდინარეობს აბონირების პროცესი - ოჯახში შეყვანა. ამ სამუშაოების დასრულების შემდეგ, ხონში დაახლოებით, 4000 აბონენტი იქნება გაზიფიცირებული - ანუ მივიღებთ სრულ დაფარვას ქალაქის. წელს, ოქტომბრამდე დაახლოებით, 700 ოჯახი ჩაირთვება და წლის ბოლომდე კი 2000 აბონენტის გამრიცხველიანება მოესწრება, დანარჩენს კი მომავალ წელს დავასრულებთ“, - განაცხადა ხონის მუნიციპალიტეტის გამგებელმა და დაამატა, რომ გაზიფიცირებასთან დაკავშირებული პროექტები მათხოჯისა და კუხის თემში, პატარა ჯიხაიშსა და გოჩა ჯიხაიშში უკვე დასრულდა.

ჯემალ მებუკეს თქმით, მუნიციპალიტეტში მსხვილი ინფრასტრუქტურული პროექტების უმრავლესობა გზების რებილიტაციასთანაა დაკავშირებული. მისი ცნობით, ერთ-ერთი მნიშვნელოვანი პროექტი, რომელიც ამჟამად მიმდინარეობს, ხონი-ივანდიდი-პატარა ჯიხაიშის დამაკავშირებელი გზის ასფალტ-ბეტონის საფარით მოწყობაა.

„ხონი-ივანდიდი-პატარა ჯიხაიშის გზა - ეს არის ერთადერთი პროექტი, რომელსაც მუნიციპალური განვითარების ფონდი გვიფინანსებს. მოეწყობა 3.5 კმ-იანი გზა, რომლის სამუშაოებზეც მლნ 140 000 ლარია გათვალისწინებული.

მიმდინარე პროექტებს შორის მნიშვნელოვანია ასევე ქალაქ ხონში, დევნილთა დასახლებაში, სადაც აფხაზეთიდან დევნილი 1 500 ადამიანი ცხოვრობს, შიდა გზების რეაბილიტაცია - დაიგება ასფალტ-ბეტონი. პროექტი აგვისტოს თვეში დავიწყეთ და მას მიმდინარე წელს დავასრულებთ. სამუშაოები რეგიონული განვითარებისა და ინფრასტრუქტურის სამინისტროს რეგიონული განვითარების ფონდის ფინანსური მხარდაჭერით ხორციელდება და დაახლოებით, 240 000 ლარამდე დაიხარჯება.

სოფელ გუბში მიმდინარეობს ასევე საბავშვო ბაგა-ბაღის მშენებლობა, რაზეც დაახლოებით 200 000 ლარია გამოყოფილი. სამუშაოების დასრულება სექტემბრის ბოლოსთვის არის დაგეგმილი“, - განუცხადა Guardian.ge-ს ჯემალ მებუკემ.

მისივე თქმით, 2016 წლის გეგმით განსახორციელებელი ბევრი მსხვილი ინფრასტრუქტურული პროექტი უკვე დასრულდა. მათი უმრავლესობა კი ქალაქ ხონისა თუ სასოფლო გზების მოწყობას გულისხმობდა.

„დავასრულეთ ხონში იპოლიტე ხვიჩიას სახელობის ქუჩის მოასფალტება და სანიაღვრე არხების რეაბილიტაცია. პროექტი დაგვიფინანსა რეგიონული განვითარების ფონდმა 80 000 ლარით.

დასრულდა მოსე ხონელის სახელობის ქუჩა თავისი ორი შესახვევით, ასევე ირაკლი აბაშიძის სახელობის ქუჩის მოასფალტება და სანიაღვრე არხების რეაბილიტაცია, რაზეც 200 000 ლარამდე იყო გათვალისწინებული.

მოეწყო ბარათაშვილის სახელობის ქუჩა თავისი სანიაღვრე არხებით, რაზეც 100 000 ლარი დაიხარჯა.

რეგიონული განვითარების ფონდიდან გამოყოფილი 260 000 ლარით ხონში კეთილმოეწყო მრავალბინიანი საცხოვრებელი სახლების ეზოები.

ხონის სამუსიკო სკოლის შენობის რეაბილიტაცია დავიწყეთ გასულ წელს, ორეტაპიანი იყო და წელს დავასრულეთ, მეორე ეტაპზე 102 000 ლარი დაიხარჯა.

სოფელ მათხოჯში, მდინარე ცხენისწყლის მარცხენა სანაპიროზე, ნაპირსამაგრ სამუშაოებზე რეგიონული განვითარების ფონდიდან 400 000 ლარზე მეტი დაიხარჯა.

სოფელ პატარა კუხში, პოლიკარპე კაკაბაძის სახლ-მუზეუმამდე გზის მოწყობა დავასრულეთ. სამუშაოები 250 000 ლარით იყო დაფინანსებული“, - აღნიშნა ჯემალ მებუკემ.