ის ზრდის ტემპები ეკონომიკის, როგორიც იყო, რა თქმა უნდა არ არის მომხიბლავი. 3, 5 გინდაც 4% არ არის მომხიბლავი, მაგრამ უნდა გავითვალისწინოთ ის, რომ რეგიონული კრიზისია, - აღნიშნული განცხადება საქართველოს ყოფილმა პრემიერ მინისტრმა, ბიძინა ივანიშვილმა რაჭაში რეგიონულ მედიასთან შეხვედრისას გააკეთა.

მისი თქმით, კრიზისი არის ამერიკასა და ევროპაშიც და სწორედ ეს მოქმედებს ქართული ეკონომიკის ზრდის ტემპებზე.

"ეკონომიკა ამპლიტუდურად ვითარდება. შეიძლება ვთქვათ, რომ სადღაც ძირშია დღეს, ავიღოთ თუნდაც საქართველო ან ჩვენი რეგიონი. გვინდა თუ არ გვინდა, მარტო საქართველო საოცრებებს ვერ მოახდენს. თუ რეგიონში მძიმე პირობებია და ეკონომიკა კრიზისთანაა კავშირში, რა თქმა უნდა, მარტო ერთი ქვეყანა სწრაფად ვერ განვითარდება. თუმცა, მიუხედავად იმისა, რომ რთული რეგიონული პირობები და კრიზისია, საქართველო არის ლიდერი ზრდის ტემპით. მართალია, ოპონენტები გვიკიჟინებენ, რომ 3-4%-ით ვტრაბახობთ, ზრდის ტემპით მაინც პირველ ადგილზე ვართ რეგიონში. ეს არ ყოფილა არასდროს.

ყოფილა უფრო მაღალი ზრდა 2007 წელს "ნაციონალური მოძრაობის" დროს, მაგრამ მაშინ გაცილებით მეტი იყო რეგიონული ზრდაც სხვა ქვეყნების. საერთოდ, როცა ეკონომიკა იზრდება ყველგან, ყველაზე მაჩანჩალა ქვეყანაშიც იზრდება. სადაც ცუდი მენეჯმენტია, ცუდი მთავრობაა - იქაც იზრდება. მე მგონია, რომ ერთ წეილიწადში, უახლოეს დროში ეს რეგიონული კრიზისი უნდა დასრულდეს და ყველაფერი მზაობა აქვს დღეს საქართველოს იმისათვის, რომ ძალიან სწრაფი ტემპებით ეკონომიკა გაიზარდოს", - განაცხადა ივანიშვილმა და კოალიციის მიერ მმართველობის დაწყების პირველი ხანები და მისი პრემიერ მინისტრობის პერიოდი გაიხსენა და აღნიშნა, რომ მთავრობა ჯიბეში არ უძვრებოდა ბიზნესმენებს, დაიწყო ბიზნესის ხელშეწყობა და მთელი რიგი სხვა პირობების დაცვა, რომლებმაც სწრაფი ეკონომიკური ზრდა უნდა უზრუნველყონ.

"მე პროგნოზსაც არ მოვერიდები და ვიტყვი, რომ 7-8 წელიწადში, ეკონომიკის გაორმაგება არის მოსალოდნელი, თუ კიდევ რამე უბედურება არ დატრიალდა", - აღნიშნა ივანიშვილმა.