საქართველოს პრეზიდენტის ადმინისტრაციის შენობაში ეროვნული უშიშროების საბჭოს სხდომა გაიმართა.

უშიშროების საბჭოს დღევანდელ სხდომაზე ცნობილი გახდა, რომ საქართველოს სამხედრო ძალების რაოდენობა 2017 წლისთვის არ შეიცვლება და და 37 000-მდე დარჩება.

როგორც სხდომის დასრულების შემდეგ გენერალური შტაბის უფროსმა, გენერალ-მაიორმა ვახტანგ კაპანაძემ განაცხადა, ეს არის ის რაოდენობა, რომელსაც არ სჭირდება დამატებითი შეთანხმება.

„გადაწყდა, რომ შეიარაღებული ძალების რაოდენობა დარჩეს ის, რაც იყო, ანუ არა უმეტეს 37 000-სა. ეს არის ის რაოდენობა, რომელსაც არ სჭირდება დამატებითი შეთანხმება. რაოდენობის გაზრდის შემთხვევაში საჭირო იქნება დამატებითი შეთანხმება პარლამენტთან", - განაცხადა სხდომის შემდეგ ვახტანგ კაპანაძემ.

უშიშროების საბჭოს დღევანდელ სხდომაზე საქართველოს თავდაცვის სამინისტროში დაგეგმილი რეფორმების შესახებაც იმსჯელეს, რა მიმართულებითაც, კაპანაძის თქმით, დასახულია საკმაოდ რეალისტური გეგმები.

„რა თქმა უნდა, ჩვენ უნდა ვიყოთ ორიენტირებული ქვეყნის თავდაცვაზე და არა შეტევითი ოპერაციების განხორციელებაზე“,- დასძინა ვახტანგ კაპანაძემ.

სხდომას ესწრებოდნენ პრეზიდენტი გიორგი მარგველაშვილი, ეროვნული უშიშროების საბჭოს მდივანი ირინე იმერლიშვილი, პრემიერ მინისტრი გიორგი კვირიკაშვილი, თავდაცვის მინისტრი ლევან იზორია, საგარეო საქმეთა მინისტრი მიხეილ ჯანელიძე, შინაგან საქმეთა მინისტრი გიორგი მღებრიშვილი, გენერალური შტაბის უფროსი, გენერალ-მაიორი ვახტანგ კაპანაძე, სახელმწიფო უსაფრთხოების სამსახურის უფროსი ვახტანგ გომელაური და პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილი.