„ქართული ოცნება“ მზად არის მემორანდუმი გაუგზავნოს არჩევნებში მონაწილე პოლიტიკურ პარტიებს და მათთან დაიწყოს კონსულტაციები“,-განაცხადა „ქართული ოცნების“ აღმასრულებელმა მდივანმა, ირაკლი კობახიძემ დღეს გამართულ ბრიფინგზე.

მისი თქმით, „ქართული ოცნება“ ყველა საარჩევნო სუბიექტს სთავაზობს, შეუერთდნენ შესაბამის მემორანდუმს, რათა უზრუნველყოფილი იყოს არჩევნების ჩატარება კორექტულ და მშვიდობიან გარემოში.

„გვსურს, ერთხელ კიდევ დავაფიქსიროთ ჩვენი მკაფიო პოზიცია საარჩევნო პროცესში კონტრაქციების გამართვასთან დაკავშირებით, რაზეც გუშინ გააკეთა შესაბამისი განცხადება ჩვენმა ლიდერმა, გიორგი კვირიკაშვილმა.

ერთხელ კიდევ ვაცხადებთ, რომ კონტრაქციების გამართვა და სხვა სუბიექტისთვის აგიტაციაში ხელის შეშლა ჩვენთვის არის საარჩევნო პროცესებში მონაწილეობის მიუღებელი ფორმა.  კონტრაქციები არის პროვოკაციების მოწყობის, მათ შორის, ძალადობის პროვოცირების ყველაზე საშიში ინსტრუმენტი.

აქედან გამომდინარე, პარტიების მხრიდან კონტრაქციებზე უარის თქმით, მინიმუმამდე იქნებოდა დაყვანილი პროვოკაციების მოწყობისა და ძალადობის პროვოცირების რისკი.

ჩვენ ავიღეთ პასუხისმგებლობა საარჩევნო პროცესში აგიტაციის მხოლოდ კორექტული ფორმების გამოყენებაზე. ამასთან, უწყებათაშორისი კომისიის ფორმატში ჩვენ არაერთგზის მოვითხოვეთ „პოლიტიკური პარტიებისგან" ანალოგიური პოზიციის დაფიქსირება, თუმცა, „ნაციონალურმა მოძრაობამ“ უარი თქვა, აეღო პოლიტიკური პასუხისმგებლობა კონტრაქციების არ გამართვაზე.

ბოლო რამდენიმე კვირის განმავლობაში ამ პარტიის მიერ დაიგეგმა და განხორციელდა კიდეც კონტრაქციები აჭარაში, სამეგრელოში და სხვა რეგიონებში. იმისათვის, რომ მინიმუმამდე იყოს დაყვანილი პროვოკაციების მოწყობისა და განსაკუთრებით, ძალადობის პროვოცირების რისკი, მოვუწოდებთ ყველა საარჩევნო სუბიექტს, აიღონ პოლიტიკური პასუხისმგებლობა კონტრაქციების არგამართვაზე.

ამ მიზნით, ვთავაზობთ ყველა საარჩევნო სუბიექტს შეუერთდნენ შესაბამის მემორანდუმს, რათა უზრუნველყოფილი იყოს არჩევნების ჩატარება კორექტულ და მშვიდობიან გარემოში. მემორანდუმის ტექსტი მზად არის და „ქართული ოცნება“ მზად არის მემორანდუმი გაუგზავნოს არჩევნებში მონაწილე პოლიტიკურ პარტიებს და მათთან დაიწყოს კონსულტაციები”, - აღნიშნა ირაკლი კობახიძემ.