ქალაქ ამბროლაურში კოსტავას ქუჩაზე მდებარე სამი სარეკლამო ბილბორდიდან, რომლის ფაქტობრივ მფლობელსაც სარეკლამო კომპანია outdoor.ge წარმოადგენს, ონის, ამბროლაურის, ცაგერის, ლენტეხისა და მესტიის გაერთიანებულ საარჩევნო ოლქში „ქართული ოცნების“ და „ნაციონალური მოძრაობის“ მაჟორიტარი დეპუტატობის კანდიდატების წინასაარჩევნო სააგიტაციო ბანერები ჩამოიხსნა.

როგორც ქალაქ ამბროლაურის მუნიციპალიტეტის მერმა, რატი ნამგალაძემ Guardian.ge-ს განუცხადა, outdoor.ge-ს აღნიშნულ ადგილზე სარეკლამო ბილბორდის განთავსების ნებართვა არ გააჩნია და შესაბამისად, მასზე ბანერის განთავსებაც არაკანონიერია.

ნამგალაძის თქმით, ზემოთ აღნიშნულიდან გამომდინარე, ქალაქ ამბროლაურის მუნიციპალიტეტის მერიამ მაჟორიტარი დეპუტატობის კანდიდატების წინასაარჩევნო სააგიტაციო ბანერების ჩამოხსნის გადაწყვეტილება მიიღო.

„ზუსტად რიცხვი არ მახსოვს. დაახლოებით 4-5 სექტემბერს განთავსდა ალბათ. ჯერ „ნაციონალური მოძრაობის“ პლაკატი გაიკრა, მეორე დღეს გაიკრა „ქართული ოცნების“. ჩვენ იმ დღესვე მივმართეთ „ნაციონალურ მოძრაობას“ და „ქართულ ოცნებასაც“. დაახლოებით 3-4 დღის მერე ორივე ბანერი მოიხსნა“,-აღნიშნა ნამგალაძემ და დასძინა, რომ წინასაარჩევნო სააგიტაციო ბანერების ჩამოხსნის გამო, „ნაციონალურმა მოძრაობამ“ ბრიფინგი გამართა, „ქართულ ოცნებას“ კი მომხდარი ფაქტი არ გაუპროტესტებია.