ინტენსიური ნალექის დროს ბათუმის ცენტრალურ ნაწილში სანიაღვრე არხების გამტარუნარიანობა ქვაფენილის ქვიშა-ღორღოვანი მასის გამო მცირდება.

დღეს ბათუმში მოსულ უხვ ნალექთან დაკავშირებით განცხადება მუნიციპალური ინფრასტრუქტურის რეაბილიტაციის პროექტის საკითხებში ბათუმის მერის მრჩეველმა, ჯაბა ტუღუშმა გააკეთა.

რაც შეეხება ე.წ. ჭაობის დასახლებას, მისი თქმით, მიმდინარეობს წყალანირების სისტემის რეაბილიტაცია, რის დასრულების შემდეგაც განხორციელდება სანიაღვრე არხების დამონტაჟება და გზის საფარის აღდგენა, რაც არსებულ მდგომარეობას გამოასწორებს.

„გარდა ამისა, დაგეგმილია სანიაღვრე-სატუმბი ნაგებობის აშენება არდაგანის ტბის მიმდებარე ტერიტორიაზე, რომელიც უხვნალექიანობის დროს სანიაღვრე წყლების შეუფერხებელ გატარებას უზრუნველყოფს“,-აღნიშნა ტუღუშმა.

ბათუმის მთავრობის ადმინისტრაციის პრესსამსახურის ცნობით, უხვი ნალექის მოსვლასთან დაკავშირებით, საგანგებო რეჟიმში მუშაობს შპს „ბათუმის წყალი“, რომლის ბრიგადები უწყვეტ რეჟიმში ახორციელებენ წყლის ამოტუმბვის სამუშაოებს.

„შესაბამისი სამსახურების წარმომადგენლებთან ერთად ქალაქის მასშტაბით მონიტორინგს ახორციელებს ბათუმის მერი გიორგი ერმკოვი.

სანიაღვრე წყლების სწრაფი გადინების მიზნით გახსნილია ზღვაში გამსვლელი ყველა არხი.

ამ დროისთვის შპს „ბათუმის წყლის“ ცხელ ხაზზე 45 გამოძახება დაფიქსირდა. ყველა გამოძახებაზე ხდება დროული რეაგირება.

ძლიერი წვიმის გამო გადაადგილების პრობლემა არ შექმნია სასწრაფო-სამედიცინო დახმარების ბრიგადებს და საზოგადოებრივი დანიშნულების ტრანსპორტს. შეზღუდვა არ დაფიქსირებულა წყალმომარაგებაში.

ამ დროისთვის ბათუმში ისევ წვიმს, თუმცა ქალაქის ქუჩებში წყლები აღარ დგას”, - ნათქვამია ადმინისტრაციის განცხადებაში.