"მთავარი სამშობლოა და მსოფლიო ისტორიის მანძილზე იმის ძალიან ბევრი მაგალითია, თუ რა ხდება და რა ემართება იმ ქვეყნებსა და ერებს, რომლებიც რუსებს არ ელაპარაკებიან დიპლომატიის ენით", განუცხადა ჟურნალისტებს "გაერთიანებული დემოკრატიული მოძრაობის" ლიდერმა ნინო ბურჯანაძემ.

"ვინც ადევნებს თვალს ჩემ განცხადებებსა და მოვლენების განვითარების დინამიკას, დამეთანხმება, რომ იგივე ადამიანები, იგივე პოლიტიკური ძალები, რომლებიც მე ანათემას გადამცემენ ხოლმე, ჩემს სიტყვებს იმეორებენ. მოვლენების განვითარება ადასტურებს, რომ ჩემს მიერ გაკეთებული პროგნოზი ან განცხადება იყო დროული, ადეკვატური და ერთადერთი სწორი. მე არაერთგზის მითქვამს და კიდევ ერთხელ ვიმეორებ - რა თქმა უნდა, პირველ რიგში ჩვენ უნდა ვისაუბროთ პირდაპირი დიალოგის მეშვეობით აფხაზებთან და ოსებთან, მაგრამ რუსებთან მოლაპარაკების გარეშე, რუსეთის პოზიტიური წვლილის გარეშე, სამწუხაროდ, ვერ მოხერხდება ვერანაირი პროგრესი. მთავარი სამშობლოა და მსოფლიო ისტორიის მანძილზე იმის ძალიან ბევრი მაგალითია, თუ რა ხდება და რა ემართება იმ ქვეყნებსა და ერებს, რომლებიც რუსებს არ ელაპარაკებიან დიპლომატიის ენით და ცდილობენ ძალის ან შანტაჟის ენით დაელაპარაკონ.

იმედი მაქვს, რომ ბოლო დროს განვითარებული მოვლენები მაინც იქნება ჭკუის სასწავლებელი ნამდვილი პატრიოტებისათვის, რომლებიც თუნდაც ცდებოდნენ, ხოლო ვინც დაკვეთებს ასრულებს და მართლა "პაგონები" აქვთ და კონკრეტული სახელმწიფოების ინტერესებს აყენებენ საქართელოს ინტერესებზე მაღლა, იმ ადამიანებისთვის, რა თქმა უნდა, ჭეშმარიტება არასოდეს არ იქნება ის, რაც ჩვენ ქვეყანას სჭირდება", - განაცხადა ნინო ბურჯანაძემ.