ოპონენტები სულ ამბობდნენ და ახლაც ამბობენ, რომ ჩამოიშალა პოლიცია, კრიმინალი გამძაფრდა, მანქანებს ამტვრევდნენ, არადა თვითონ დაამტვრიეს რამდენიმე მანქანა და პროვოკაციაზეც წამოეგნენ, - აღნიშნული განცხადება ყოფილმა პრემიერ მინისტრმა, ბიძინა ივანიშვილმა სამცხე-ჯავახეთში, რეგიონულ მედიასთან შეხვედრისას გააკეთა.

ივანიშვილმა ამ კუთხით ქვეყანაში დღეს არსებული ვითარება მიმოიხილა და მსოფლიო ბანკის მიერ დაფინანსებული ორგანიზაციების სტატისტიკურ მონაცემებზეც ისაუბრა.

"დღეს ვერავინ ვერ იტყვის, რომ პოლიცია ძალადობს, ერთეული შემთხვევები ყველგან ხდება და ამაზეც ადექვატური რეაქცია კეთდება. ხედავთ, რომ საერთაშორისო რეიტინგებშიც იცით რა ხდება. 2012 წლამდე საქართველოს ყველაზე მაფიოზური ქვეყნების რიცხვში, 75-ე ადგილზე იყო. რეიტინგები კეთდება ქონების დაცვასთან დაკავშირებითაც და ამ ნიშნით, მსოფლიო საუკეთესო ოცეულში შევდივართ. "ნაციონალური მოძრაობის" დროს ვიკავებდით 131-ე ადგილს საკუთრების დაცვის რეიტინგში. და არაფერი არ გვიკვირს, რადგან გვახსოვს, რომ მთელი ბიზნესი კონტროლდებოდა. მთავარი პროკურორი აკეთებდა მონიტორინგს, 5000 დოლარის გადარიცხვაც კი კონტროლდებოდა. რეალურად საქართველოში ბიზნესი იყო მთლიანად დათრგუნული. 2012-ში მათ რომ ისევ არჩევნები მოეგოთ, აქ ვეღარავინ ვერ დარჩებოდა. დღეს, ამ მაჩვენებლით, საუკეთესო ოცეულში ვართ. მსოფლიო ბანკის ჯგუფის წევრის, საერთაშორისო საფინანსო კორპორაციის IFSI-ის კვლევის თანახმად, საქართველოში კორუფცია თითქმის ნულოვან დონეზეა. 800-ზე მეტი ორგანიზაციაა გამოკითხული და და ვიღაც ორი ამბობს, რომ სადღაც ყური მოკრა, მაგრამ პირდაპირი მნიშვნელობით ვერცერთი ვერ ასახელებს. საოცარი შედეგი მივიღეთ, როდესაც გახსოვთ რა იყო საქართველოში - ელიტარული კორუფცია ყვაოდა, ერთი ჯგუფი აკონტროლებდა ბიზნესს და მთელი ქონების გადანაწილებაც ხდებოდა ერთი ჯგუფის მიერ", - განაცხადა ბიძინა ივანიშვილმა.