„ყველაზე დიდ ქველმოქმედებად ის მიმაჩნია, რომ საკუთარ პიროვნებას ფუფუნებას არ ვაძლევ, რომ ჩრდილში წავიდე და ვიცხოვრო ფუფუნებაში“,-განაცხადა  ყოფილმა პრემიერ მინისტრმა, ბიძინა ივანიშვილმა სამცხე-ჯავახეთში რეგიონულ მედიასთან შეხვედრის დროს.

ექსპრემიერის თქმით, მას სურს, რომ საკუთარი ცოდნა და გამოცდილება ქვეყანას მოახმაროს.

„ის, რაც მაქვს ცოდნა, ენერგია და გამოცდილება, მინდა ჩემს ქვეყანას მოვახმარო, რომ სწორი გზით განვითარდეს“,-აღნიშნა მან.

ივანიშვილმა მის მიმართ გამოთქმულ კრიტიკაზეც ისაუბრა და განაცხადა, რომ  გასაგებია თუ რატომ აკრიტიკებენ მას „ნაციონალური მოძრაობის“ წარმომადგენლები.

„შეურაცხყოფები, წყევლა, კრულვა და გინება მოდის ჩემ მიმართ. ვინ იგინება ძირითადად ვნახოთ პრინციპში. აქვთ თუ არა ამის საფუძველი, შეიძლება ერთი ანდაზით დავიწყნარო თავი, რომ „ვირისგან წიხლი საწყენად არ უნდა მიიღო“.  ვინც გინება იცის, ის იგინება. „ნაციონალებისგან“ კრიტიკა გასაგებია და უნდა მაკრიტიკონ და მაგინონ. გახსოვთ მთელი ქვეყანა ფეხქვეშ ჰქონდათ გადებული, საკუთრებად მიაჩნდათ ეს ქვეყანა ერთ პატარა ჯგუფს, ერთი კაცის მეთაურობით. ყველაფერი მათი იყო და დღეს ვინ სადაა - ზოგი ციხეშია, ზოგი გაქცეულია, სადღაც არის, დევნაშია და დანარჩენი ჯგუფი აგრესიულად ცდილობს ის დაიბრუნოს, რაც ჰქონდათ. გასაგებია, რომ მაგინებენ“,-განაცხადა ივანიშვილმა.