„ეს საზარელი მოვლენა, რაც საქართველოში მოხდა 2011 წლის 26 მაისს, ვერ წაიშლება ჩვენი მეხსიერებიდან“,-განაცხადა პარლამენტის თავმჯდომარემ, დავით უსუფაშვილმა და აღნიშნა, რომ 26 მაისის საქმეზე ახალი მტკიცებულების გამოქვეყნებას საარჩევნო გადაწყვეტილებებზე გავლენა ვერ ექნება.

მისი თქმით, კარგი იქნებოდა, რომ მტკიცებულების მოპოვება და კუდ-ის მაღალჩინოსნებისთვის ბრალის წაყენება ადრე მომხდარიყო, რათა სპეკულაციის საშუალება არავის მისცემოდა.

„ჩვენ ამ კადრებმა გაგვახსენა ის ყველაფერი, რაც ერთად ვნახეთ და ყველა დარწმუნებული ვართ, რომ ეს იყო საზარელი დანაშაული, ჩადენილი სახელისუფლებო სისტემის მიერ, საკუთარი მოქალაქეების წინააღმდეგ. ამ დანაშაულის გამოძიება დაიწყო 4 წლის წინ. რამდენიმე დამნაშავეს მიესაჯა სასჯელი. იყო განცდა, რომ ეს არ იყო სრულყოფილი გამოძიება და ამიტომ კარგია თუ პროკურატურას დღეს აქვს ახალი სამხილები და ახალი მასალები. მაგრამ კარგი იქნებოდა, რომ ეს ყოფილიყო უფრო ადრე და არ იყოს სპეკულაციების საშუალება. მე არ მგონია რომ დღეს ამ მასალების გამოქვეყნებამ, ვინმეს, ვისაც გადაწყვეტილი აქვს „ნაციონალური მოძრაობისთვის“ ხმის მიცემა, მას ხელი ააღებინოს ამ გადაწყვეტილებაზე. მე ნამდვილად ვიცი, რომ ამას საარჩევნო გადაწყვეტილებებზე გავლენა ვერ ექნება, რადგან ვინც დღემდე ვერ დარწმუნდა, რომ არ შეიძლება მიხეილ სააკაშვილის საქართველოს ხელისუფლებაში მობრუნება, ის ვერც ამ კადრების ნახვით დარწმუნდება“, - განაცხადა უსუფაშვილმა.

მთავარი პროკურატურის მიერ ჩატარებული გამოძიების შედეგად, 2011 წლის 26 მაისს, რუსთაველის გამზირზე მომიტინგეთა დარბევისა და მასობრივი დაკავების  ფაქტზე, ბრალდებულად იქნა ცნობილი კონსტიტუციური უსაფრთხოების დეპარტამენტის ყოფილი დირექტორი დავით ახალაია, მისი მოადგილე ვასილ ლელუაშვილი, ამავე დეპარტამენტის თბილისის მთავარი სამმართველოს უფროსი რევაზ შიუკაშვილი და მეორე მთავარი სამმართველოს უფროსი ლევან ქარდავა.   

ასევე საპროცესო მოქმედებაში მონაწილეობის მისაღებად, აღნიშნულ დანაშაულებრივ ფაქტთან დაკავშირებით, დაბარებულ იქნა შინაგან საქმეთა მინისტრის ყოფილი მოადგილე გიორგი ლორთქიფანიძე. მას მიეცა გონივრული დრო საგამოძიებო ორგანოში გამოცხადების მიზნით.   

საქმეზე გრძელდება გამოძიება დავით ახალაიას, ვასილ ლელუაშვილის, რევაზ შიუკაშვილის და ლევან ქარდავას მიმართ, სამსახურებრივი უფლებამოსილების გადამეტებისთვის ჩადენილი ძალადობით, საქართველოს სისხლის სამართლის კოდექსის 333-ე მუხლის მესამე ნაწილის „ბ“ ქვეპუნქტით, რაც სასჯელის სახედ და ზომად ხუთიდან რვა წლამდე თავისუფლების აღკვეთას ითვალისწინებს.