"ქართული ოცნების" მიერ "მშვიდობის მემორანდუმის" გასაჯაროვებას საქართველოს ყოფილი პრემიერ მინისტრი ბიძინა ივანიშვილი ეხმაურება და აცხადებს, რომ "ამის საჭიროება არ უნდა დამდგარიყო".

ყოფილი პრემერი იმედოვნებს, რომ მემორანდუმს ყველა პოლიტიკური სუბიექტი მოაწერს ხელს.

„მე ვფიქრობ, წინა ხელისუფლების მმართველობის ცუდი დანატოვარია და ძირითადად მათივე აგრესიული გამოვლინებებია დაპირისპირება, როცა ერთი გუნდი ატარებს აქციას და მიდიან სხვები. როდესაც ჩვენ პოლიტიკაში მოვედით, პრინციპში საშუალება არ გვქონდა გავსულიყავით და მოსახლეობას შევხვედროდით. ძალიან აქტიურობდნენ ე.წ. ზონდერები და ხშირად მუშტი-კრივში გადადიოდა შეხვედრა. დღევანდელი ხელისუფლება ჩემი აზრით, ამ მხრივ პრობლემებს არ ქმნის, ცალკეული პროვოკაციები არის, არის სხვადასხვა პარტიებიდან, ძირითადად გასაგებია საიდანაც, მაგრამ ვალდებულება და პასუხისმგებლობა ხელისუფლებისაა და ეს ინიციატივაც შემთხვევითი არ არის.

რა თქმა უნდა, ხელისუფლების ვალდებულებაა, აღკვეთოს პროვოკაციები, მაგრამ ისე არ უნდა ვქნათ, რომ ნებისმიერ პროვოკაციაში, ვისგანაც არ უნდა იყოს ინსპირირებული, წინასწარ ხელისუფლება დავადანაშაულოთ. ყველა პარტია უნდა იყოს პასუხისმგებელი, რომ მსგავსი არ მოხდეს“, - დასძინა ბიძინა ივანიშვილმა.

"ქართულმა ოცნებამ" პოლიტიკურ ოპონენტებს ე.წ. მშვიდობის მემორანდუმი შესთავაზა, რომელიც წინასაარჩევნოდ არჩევნებში მონაწილე სუბიექტებს შეთანხმებისკენ მოუწოდებს, რათა უზრუნველყონ მათი აქტივისტების დისტანცირება სხვა პარტიების მიერ ან მის მხარდასაჭერად გამართული აქციისგან, შეხვედრისგან ან სხვა მსგავსი სახის ღონისძიებისგან და მიიღებენ ყველა ზომას, რათა არ დაუშვან მათი აქტივისტების მხრიდან სხვა საარჩევნო სუბიექტის მიერ გამართული ღონისძიების ხელშეშლა.