„სამწუხაროდ, არც ერთ ქვეყანაში არ ტარდება არჩევნები ისე, რომ ფორმალური დარღვევა არ მოხდეს, მთავარია, ეფექტური რეაგირების მექანიზმები არსებობდეს“, - აღნიშნა „ქართული ოცნების“ ერთ-ერთმა წევრმა, „საქართველოს ახალგაზრდა იურისტთა ასოციაციის“ ყოფილმა თავმჯდომარემ, თამარ ჩუგოშვილმა, რითაც საია-ს დღევანდელ განცხადებას გამოეხმაურა.

მისი თქმით, ის საია-ს განცხადებას არ გაცნობია და არც ამ კონკრეტული ფაქტის შესახებ აქვს ინფორმაცია.

„განცხადებას არ ვიცნობ, მაგრამ აუცილებლად გავეცნობი. თუმცა რაც შეეხება საერთაშორისო სადამკვირვებლო მისიების შეფასებებს, რამდენიმე დღის წინ გავეცანით IRI-ს და ევროსაბჭოს შეფასებებს, სადაც ნათქვამია, რომ არჩევნები არის თავისუფალი და სამართლიანი. ის შედარებულია 2012 წელთან და ყველა მონიტორინგის ანგარიშში პირობების გაუმჯობესებაზეა საუბარი. იზოლირებული დარღვევები, დარწმუნებული ვარ, არის და იქნება კიდეც. სამწუხაროდ, არც ერთ ქვეყანაში არ ტარდება არჩევნები ისე, რომ ფორმალური დარღვევა არ მოხდეს, მთავარია, ეფექტური რეაგირების მექანიზმები არსებობდეს“, - აღნიშნა თამარ ჩუგოშვილმა.

დღეს საია-ს თავმჯდომარემ, ანა ნაცვლიშვილმა პრესკონფერენციაზე განაცხადა, მათთვის ცნობილი გახდა, რომ სხვადასხვა პოლიტიკური პარტიის წარმომადგენლები მიდიან მოქალაქეებთან და პირადი მონაცემების გაცემას სთხოვენ, თუმცა არანაირ განმარტებას არ აკეთებენ, რისთვის სჭირდებათ პერსონალური ინფორმაცია.

„ახალგაზრდა იურისტთა ასოციაცია“ მოქალაქეებს მოუწოდებს, არ გასცენ საკუთარი პირადი მონაცემები და განმარტავს, რომ პოლიტიკური პარტიების წარმომადგენლებს ან საჯარო მოხელეებს არ აქვთ უფლება მოქალაქეს ამგვარი ინფორმაციის გაცემა აიძულონ.

„ყველაზე მოწყვლადი ჯგუფები არიან დევნილები და სოციალურად დაუცველები, რომელთაც აქვთ შიში, რომ თუ პირად მონაცემებს არ გასცემენ, მათ შეიძლება სოციალური დახმარება მოუხსნან. მოქალაქეს აქვს უფლება, ასეთი ინფორმაცია არ გასცეს და ვერავითარ შემთხვევაში მათ დახმარებას ვერავინ შეუწყვეტს",- აღნიშნა ნაცვლიშვილმა.