თბილისში ვატიკანის საელჩოსთან, მართლმადიდებელ მშობელთა კავშირის ორგანიზებით, რომის პაპის საქართველოში ვიზიტის გამო საპროტესტო აქცია მიმდინარეობს.

აქციაზე შეკრებილი არიან მღვდელმსახურები და მრევლი, რომლებსაც მიტანილი აქვთ ბანერები, სადაც პაპის საქართველოში ვიზიტს აპროტესტებენ.

აქციის მონაწილეებმა საპროტესტო აქციაზე პარაკლისიც გადაიხადეს.

„არ გვჭირდება რომის პაპის და კათოლიკური ეკლესიის ქადაგება“,-აცხადებენ აქციის მონაწილეები.

ტერიტორიაზე მობილიზებულია სამართალდამცველები.

რომის პაპი ფრანცისკე  მიმდინარე წლის 30 სექტემბერს საქართველოს ეწვევა. ვიზიტის ფარგლებში, რომის პაპი საქართველოს პრეზიდენტს, გიორგი მარგველაშვილს, სამოქალაქო სექტორისა და დიპლომატიური კორპუსის წარმომადგენლებს, საქართველოს კათოლიკოს-პატრიარქს, ილია მეორეს და ასირიულ-ქალდეური კათოლიკური თემის წარმომადგენლებს შეხვდება. 

1-ელ ოქტომბერს კი რომის პაპი მიხეილ მესხის სახელობის სტადიონზე მესას აღავლენს, რის შემდეგაც ღვთისმშობლის მიძინების ტაძარში მღვდლებს და სხვა სასულიერო პირებს შეხვდება. აღნიშნულის შემდეგ რომის პაპი მცხეთაში, სვეტიცხოვლის ტაძარს ეწვევა.

2 ოქტომბერს, კვირას დილით რომის პაპი ფრანცისკე თბილისის საერთაშორისო აეროპორტიდან გაცილების ცერემონიის შემდეგ ბაქოში ჩავა, სადაც „Salesian-ის ცენტრში“ მესას აღავლენს. ბაქოში ვიზიტის დროს, ის შეხვდება ქვეყნის პრეზიდენტს და სამოქალაქო სექტორის წარმომადგენლებს. რომის პაპი ბაქოს 2 ოქტომბერსვე დატოვებს.