„დარბევის, ძალის გამოყენების, ადამიანების დასისხლიანების, მასობრივად დაკავების, მერე წამების და ა. შ. რაიმე მსგავსი უფლება ბუნებაში არ არსებობს“, - ასე უპასუხა "ქართული ოცნების" წევრმა, თამარ ჩუგოშვილმა ჟურნალისტებს, რომლებმაც შეახსენეს მის მიერ გაკეთებული განცხადება, რომელიც 26 მაისს გამართულ აქციას ეხებოდა და რომლის დაშლის სამართლებრივი საფუძვლებიც, მისი შეფასებით, არსებობდა.

„ეს იყო კრიმინალი, რა ზომაც და ფორმაც გამოიყენა სახელმწიფომ. ეს იყო ცალსახა კანონდარღვევა. რაც შეეხება აქციის გამართვას, 25 მაისს მე გავაკეთე სამართლებრივი შეფასება და ამ შეფასებას ვიზიარებ დღესაც. ასეთ შემთხვევაშიც კი არ შეიძლება ძალის გადამეტება, თუმცა სახელმწიფომ არა თუ ძალას გადაამეტა, არამედ ჩაიდინა ძალიან მძიმე დანაშაული და ამ დანაშაულისთვის პასუხი უნდა აგოს იმ პირებმა, ვისი ბრალიც არის“, - განაცხადა თამარ ჩუგოშვილმა.

მისივე თქმით, „ახალგაზრდა იურისტთა ასოციაცია“, რომელსაც იმ პერიოდში ხელმძღვანელობდა, იყო თითქმის ერთადერთი ორგანიზაცია, რომელმაც ძალიან დიდი შრომა გასწია და დაკავებულ და ნაწამებ ადამიანებს დაეხმარა.

კითხვაზე, რატომ გამოაქვეყნა პროკურატურამ 26 მაისის დარბევის ამსახველი ვიდეოკადრები წინასაარჩევნოდ, ჩუგოშვილმა აღნიშნა, რომ „არ იცის“.

„ვიდეო გამოძიების მიერ გავრცელდა მაშინ, როცა საჭიროდ ჩათვალა და მე ამაზე კომენტარს ვერ გავაკეთებ, თუ როდის, რას თვლის გამოძიება საჭიროდ“, - განაცხადა ჩუგოშვილმა.