„კომპანია „ყაზტრანსგაზ-თბილისი“ შესაძლოა გაიყიდოს და შესაძლებელია, რომ ჩვენი ბაზრიდან ყაზახები გავიდნენ. თუმცა, ეს არის ორ კერძო სუბიექტს შორის მოლაპარაკებები, ასე რომ, მე ზედმეტი კომენტარისგან თავს შევიკავებდი“,- განაცხადა ენერგეტიკის მინისტრმა, ილია ელოშვილმა.

როგორც მან აღნიშნა, ყოველთვის მიესალმება კერძო გარიგებებს, თუ ხდება კანონიერად და წაადგება კომპანიას და ბიზნესს.

ილია ელოშვილმა ასევე განაცხადა, რომ კომპანიის შესაძლო გაყიდვის შესახებ გადაწყვეტილება პირდაპირ კავშირში არ არის სემეკ-ის მიერ დანიშნულ დროებით მმართველთან.

„თუმცა, იმ გადაწყვეტილებამ, რაც დღესდღეობით გაჟღერდა, რომ შესაძლოა კომპანია გაიყიდოს, არააქტუალური გახადა ამ თემაზე მუშაობა, რადგან თუ კომპანია გაიყიდა, ეს ნიშნავს, რომ თავისთავად იქ აღარ იქნება დროებითი მმართველი, დაველოდოთ როგორ განვითარდება მოვლენები და შესაბამისად ვიმოქმედებთ“, - განაცხადა ილია ელოშვილმა და დასძინა, რომ იმ დავალიანების ნაწილი, რომელიც „ყაზტრანსგაზ-თბილისს“ საქართველოს ნავთობისა და გაზის კორპორაციის, ასევე ფინანსთა სამინისტროს მიმართ გააჩნია, გადახდილია დროებითი მმართველის პირობებში, თუმცა, დარჩენილია დავალიანება, განსაკუთრებით კი ძირი.

„ჩვენ ამაზე გვექნება მოლაპარაკება ახალ მფლობელთან, თუ კომპანიის გასხვისება მოხდება“, - განაცხადა ილია ელოშვილმა.