ყოფილი პრემიერ მინისტრის, ბიძინა ივანიშვილის განცხადებით, სოციალური მიმართულებით ბიუჯეტი 3-ჯერ არის გაზრდილი.

ამის შესახებ ყოფილმა პრემიერმა კახეთში, მედიის წარმომადგენლებთან შეხვედრაზე განაცხადა და აღნიშნა, რომ სამი წლის განმავლობაში 760 მილიონი ლარი დაზოგა ხელისუფლებამ, რაც ჯანდაცვას, დევნილებს და სოციალურ მიმართულებას მოხმარდა.

მისი აზრით, მომავალ წელს ბიუჯეტი სოციალური მიმართულებით აღარ უნდა გაიზარდოს.

„რაც შეეხება დღევანდელი ხელისუფლების დამოკიდებულებას სოციალურად დაუცველებში, 3-ჯერ და 4-ჯერ არის დაფინანსება ამ მიმართულებით გაზრდილი, მაგრამ შეფასებებში კითხვები მუდამ არის. ძალიან ბევრი, სამუშაოს არ ეძებს, რომ ეს სოციალური დახმარება არ მოეხსნას. ძალიან სამარცხვინოა იმ თანხებზეც საუბარი, ისეთი მწირი თანხებია. სამწუხაროდ, რეცეპტი არ მაქვს. შეფასებებში ცვლილებები ხდება, უფრო პროგრესულია, ზოგჯერ გადაცდომებია და ხელისუფლება შემდგომ აკეთებს ამაზე რეაქციას.

ჩვენი ბიუჯეტი არის სოციალურად მიმართული ბიუჯეტი. მეც კი როდესაც 760 მილიონი აღმოვაჩინე დამატებით, რომლის ეკონომიაც გააკეთა ბიუროკრატიის შენახვაზე 3 წლის განმავლობაში ახალმა ხელისუფლებამ და 760 მილიონი დაზოგა. არსად არ მომისმენია არავისგან. არცერთ მინისტრს არ უთქვამს. ეს თანხა უზარმაზარია, ეს ფული სულ სოციალურად წავიდა ან ჯანდაცვაში ან დევნილების დახმარებაზე, თვითონ ბიუჯეტი სოციალურად დაუცველების 3-ჯერ გაიზარდა. 27 მილიონი იყო და 85 გახდა. ვერ ვიტყვით იმას, რომ ხელისუფლება ყურადღებას არ აქცევს, ვერ ვიტყვით, რომ ეს მიმართულება შეცვალა, პირიქით, შემდეგ ბიუჯეტში სოციალური არ უნდა გაიზარდოს, განათლებაზე მეტი პროცენტი უდნა დავხარჯოთ და უნდა მოვახერხოთ განათლებული საზოგადოება გვყავდეს და ამავე დროს გაჭირვებული საზოგადოება არ უნდა დავივიწყოთ“,-განაცხადა ივანიშვილმა.