„ნაციონალური მოძრაობის” ერთ-ერთი წევრის, ირმა ნადირაშვილის განცხადებით, ვიდრე ყოფილი პრემიერი ბიძინა ივანიშვილი სამარცხვინო ფორმებით გამოაგდებდა კოალიციიდან პარლამენტის თავმჯდომარეს, დავით უსუფაშვილს, მას „ნიუ-იორკ თაიმსში“ დითირამბებს უმღეროდა.

ამის შესახებ ნადირაშვილმა ჟურნალისტებთან საუბრისას თქვა, რითაც უსუფაშვილის განცხადებებს გამოეხმაურა იმის თაობაზე, რომ „ნაციონალური მოძრაობა“ და „ქართული ოცნება“ ერთმანეთს გაჭრილი ვაშლივით დაემსგავსნენ.

„არ უნდა დაგვავიწყდეს, რომ ჩვენ ვსაუბრობთ ადამიანზე, რომელსაც სანამ ბიძინა ივანიშვილი სამარცხვინო ფორმებით გამოაგდებდა კოალიციიდან, ჰქონდა ერთადერთი საქმე - ის დითირამბებს უმღეროდა ბიძინა ივანიშვილს „ნიუ-იორკ თაიმსში“ ამომრჩევლის გადახდილი ფულით, იმის ნაცვლად, რომ მსოფლიო მედიის ყურადღება საქართველოში არსებულ პრობლემებზე გაემახვილებინა“, - განაცხადა ირმა ნადირაშვილმა და დასძინა, რომ „რესპუბლიკური პარტია“ 4 წლის განმავლობაში უმაღლეს თანამდებობებს იკავებდა და პასუხისმგებელია იმ სიღატაკეზე, რომელიც ქვეყანაში არსებობს.