სპორტისა და ახალგაზრდობის საქმეთა მინისტრმა, ტარიელ ხეჩიკაშვილმა, საქართველოს რაგბის კავშირის პრეზიდენტთან, გოჩა სვანიძესთან და გორის მერთან, ზურაბ ჯირკველიშვილთან ერთად, გორში საერთაშორისო სტანდარტების ახალი სარაგბო კომპლექსის გახსნა.

სპორტისა და ახალგაზრდობის სამინისტროს ცნობით, გორის სარაგბო სტადიონი ფონდ „ქართუს“ დაფინანსებით აშენდა და ჯამში სარაგბო კომპლექსის მშენებლობასა და კეთილმოწყობაში 5. 900.00 ლარი დაიხარჯა.

კომპლექსი აერთიანებს ბუნებრივსაფარიან და ხელოვნურსაფარიან მოედნებს. სტადიონის ბუნებრივსაფარიანი მოედნის ტრიბუნა 2.500 მაყურებელს იტევს, ხელოვნურსაფარიანი კი 500 მაყურებელს.

სტადიონზე ფუნქციონირებს ტრენაჟორების დარბაზი, ასევე კეთილმოწყობილია გასახდელები, მსაჯთა და ადმინისტრაციული პერსონალისათვის განკუთვნილი ოთახები. კომპლექსში დამონტაჟებულია ღამის განათება, ტაბლო და გახმოვანების სისტემა.

სტადიონის გახსნით საქართველოს სარაგბო ჩემპიონატის - „დიდი 10“-ის გათამაშების მე-4 ტურის შეხვედრა გაიმართა გორის „ჯიქსა“ და „ბათუმს“ შორის.

დღეისათვის, ახალი სარაგბო სტადიონები აშენებულია თბილისში, ქუთაისში, რუსთავში, ფოთში, ბათუმში, მარტყოფსა და ასპინძაში, უახლოეს მომავალში სტადიონების მშენებლობა საქართველოს სხვა რეგიონებშიც იგეგმება.