იორდანიელი მწერალი, მას შემდეგ რაც გავრცელებული ცნობით, Facebook-ის საკუთარ გვერდზე სატირული კარიკატურის გაზიარების გამო გასულ თვეს, ისლამის შეურაცხყოფისთვის გაასამართლეს, სასამართლოს შენობასთან მოკლეს. 

ნაჰიდ ჰატარს, რომელიც ქრისტიანად დაიბადა, მაგრამ თავს ათეისტად მიიჩნევდა, დედაქალაქ ამანში სასამართლოს შენობის გარეთ, სადაც ის პროცესზე უნდა წარმდგარიყო, სამი ტყვია ესროლეს, იუწყება BBC ახალი ამბების სახელმწიფო სააგენტო "პეტრაზე" დაყრდნობით.

"ალ ჯაზირას" ცნობით, 56 წლის ცნობილი იორდანიელი მწერალი და ჟურნალისტი ნაჰიდ ჰატარი სასამართლოს შენობაში შესასვლელად ემზადებოდა, როდესაც შეიარაღებულმა მამაკაცმა ახლო მანძილიდან, თითქმის ერთი მეტრიდან ესროლა.

პოლიციამ ეჭვმიტანილი თავდამსხმელი, რიად აბდულაჰი დააკავა. იორდანიული მედიის ცნობით, იგი ადგილობრივი იმამი იყო, რომელიც კარიკატურამ გააბრაზა. მაგრამ "იორდანიის თაიმსს" უსაფრთხოების წყაროებმა უთხრეს, რომ იგი ცნობილი იყო, როგორც ექსტრემისტი. 

მწერალი აგვისტოში, ღმერთის შეურაცხყოფისთვის 15 დღით დააკავეს.

კარიკატურა, რომელიც მან გააზიარა, აღწერს წვერიან კაცს, რომელიც საწოლში ორ ქალთან წევს, ეწევა და სთხოვს ღმერთს, მოუტანოს მას სასმელი.

ჰატარს სოციალურ მედიაში თავს დაესხნენ იმის გამო, რომ ანტი-ისლამური კარიკატურა გააზიარა.

მწერალმა თქვა, რომ მას არ უგულისხმია შეურაცხყოფის მიყენება და უნდოდა ეჩვენებინა რადიკალი ისლამისტების შეხედულება სამოთხეზე, მაგრამ ხელისუფლებამ კარიკატურის გაზიარება კანონის დარღვევად მიიჩნია.