„საქართველო რეგიონში არის ლიდერი ეკონომიკური ზრდით, ყველა დამოკიდებულებით“,-განაცხადა ყოფილმა პრემიერ მინისტრმა, ბიძინა ივანიშვილმა ქვემო ქართლში, რეგიონული მედიის წარმომადგენლებთან შეხვედრაზე.    

მისი თქმით, 3 და 4%-იანი ეკონომიკური ზრდა არ არის მომხიბლავი მოსახლეობისთვის, ხალხს სჭირდება დახმარება, სამუშაო ადგილი,  შესატყვისი ხელფასი და შემოსავალი.

"ეკონომიკური ზრდით გამორჩეულად ლიდერია საქართველო რეგიონში. ამ დროს 3 და 4-პროცენტიანი ზრდა არ არის მომხიბლავი მოსახლეობისთვის და მით უმეტეს, მათთვის ვისაც ეკონომიკა არ ესმის და სულაც არ ითხოვენ და არ საჭიროებენ მის ანალიზს. ხალხს ელემენტარულად სჭირდება დახმარება, სამუშაო ადგილი,  შესატყვისი ხელფასი და შემოსავალი, ამაზე აკეთებენ რეაქციას, ამ დროს კი ოპონენტები სპეკულირებენ იმით, რომ - აი ნახეთ ეს რა არის“,-განაცხადა ყოფილმა პრემიერმა.   

ივანიშვილმა ასევე აღნიშნა, რომ ხელისუფლება ყველაფერს აკეთებს იმისათვის, რომ საქართველოში იყოს ძალიან კარგი გარემო  ინვესტიციებისთვის და ამ მხრივ შთამბეჭდავი შედეგებია.

„იმ ფონზე, როდესაც ჩვენი სავაჭრო პარტნიორების და რეგიონში მეზობლების ეკონომიკის შემცირება მოხდა, სტაგნაცია ჰქონდა ძალიან ბევრ ქვეყანას და შოკი განიცადეს, ამ ფონზე, რა თქმა  უნდა, შთამბეჭდავი იყო ის, რაც საქართველოს ეკონომიკამ განიცადა და როგორ მყარად იდგა. ამის საფუძველი გახდა ის დამოკიდებულება, რაც ჩვენ პრინციპულად შევცვალეთ წინა ხელისუფლებისგან განსხვავებით. ხელისუფლება დაწყებული ჩემი პრემიერობით და დამთავრებული კვირიკაშვილით, რომელიც ბიზნესთან ძალიან ახლოს არის, ყველაფერს აკეთებს იმისათვის, რომ საქართველოში იყოს ძალიან კარგი გარემო  ინვესტიციებისთვის და ამ მხრივ შთამბეჭდავი შედეგებია. ბიზნესს აქვს ლომის წვლილი ინვესტიციების მოზიდვაში. ბიზნესმა კარგად აჩვენა ის სწორება, რაც ახალმა ხელისუფლებამ მოიტანა. აი, ის სტანდარტები, რაც დანერგა ახალმა ხელისუფლებამ, ბიზნესმა კარგად აჩვენა თავის საქმიანობაში“,-განაცხადა მან.