ცენტრალურმა საარჩევნო კომისიამ (ცესკო) „პატრიოტთა ალიანსი-გაერთიანებული ოპოზიციის“ საარჩევნო კლიპის შინაარსის შესწავლა დაიწყო.
ამის შესახებ ცესკო-ს თავმჯდომარემ, თამარ ჟვანიამ ჟურნალისტებს განუცხადა.
მისივე თქმით, კონკრეტული საარჩევნო სუბიექტის რეკლამის მოხსნაზე, გადაწყვეტილება თავად მაუწყებელმა მიიღო და ამის შესახებ ინფორმაციის სახით განცხადება ცესკო-ს მიაწოდა, რატომ მოხდა ამ გადაწყვეტილების მიღება. თუმცა თამარ ჟვანიას განმარტებით, კონკრეტული მაუწყებლის ქმედებას, რეკლამის განთავსება-არგანთავსებასთან, საეთერო დროის გამოყოფასთან დაკავშირებით, ამ საკითხების მონიტორინგს და ზედამხედველობას კომუნიკაციების მარეგულირებელი ეროვნული კომისია ახორციელებს.
„შესაბამისად, მაუწყებლის ქმედებასთან დაკავშირებით ჩვენ გადაწყვეტილებას ვერ მივიღებთ, თუმცა საარჩევნო ადმინისტრაციამ თვითონ კლიპის შინაარსის შესწავლა დაიწყო, რამდენად იყო კლიპის შინაარსი ისეთი, რომელიც შესაძლოა არ ჯდებოდეს საარჩევნო კოდექსის 45-ე მუხლის მე-3 პუნქტის მოთხოვნებში და ამ ეტაპზე ეს შესწავლა მიმდინარეობს“, - განაცხადა თამარ ჟვანიამ.
„რუსთავი 2“-ის გენერალურმა დირექტორმა, ნიკა გვარამიამ „პატრიოტთა ალიანსის“ საარჩევნო ვიდეორგოლის ეთერიდან მოხსნის შესახებ ინფორმაცია „ფეისბუქის“ საკუთარ გვერდზე გაავრცელა.
“ბოლო ორი დღის განმავლობაში, ტელეკომპანია "რუსთავი 2"-ის ეთერით, რამდენჯერმე (სულ 6ჯერ) უფასო საარჩევნო რეკლამის განთავსების ვალდებულების ფარგლებში, გადაიცა "პატრიოტთა ალიანსის" საარჩევნო რგოლი, რომელიც ატარებს ღიად ანტითურქულ ხასიათს, აღვივებს ეთნიკურ შუღლს და წარმოადგენს ქსენოფობიის პროპაგანდას. აღნიშნული ეწინააღმდეგება საქართველოს კონსტიტუციას და კანონმდებლობას და, რაც ჩვენთვის განსაკუთრებით მნიშვნელოვანია, "რუსთავი 2"-ის სარედაქციო პოლიტიკას, რომლის კარდინალურ ხაზს ეთნიკური შუღლის გაღვივების და ქსენოფობიის და დისკრიმინაციის ყველა სხვა ფორმის წინააღმდეგ ბრძოლა წარმოადგენს.
სამწუხაროდ, შინაარსის ლეგალურ კონტროლზე პასუხისმგებელი პირები არ იმყოფებოდნენ სამუშაო ადგილზე და არც მე, ტელეკომპანიის გენერალურ დირექტორს, მქონდა შესაძლებლობა, თვალყური მიმედევნებინა არხის ეთერისთვის ბოლო ორი დღის განმავლობაში, ქვეყანაში არ ყოფნის გამო. სრულად ვაცნობიერებთ ჩვენს შეცდომას და სრულად ვიღებთ პასუხისმგებოლბას საკუთარ თავზე.
ტელეკომპანია "რუსთავი 2"-ის სახელით, ბოდიშს ვუხდი თურქეთის სახელმწიფოს, საქართველოში მცხოვრებ ეთნიკურ თურქებს და ყველა ჩვენს მაყურებელს, რომელიც ჩვენი ერთგული, პირველ რიგში, ჩვენი სარედაქციო ფასეულობების გამოა.
რაც შეეხება ზემოხსენებულ საარჩევნო რგოლს, იგი მოხსნილია ეთერიდან, რის შესახებაც ხვალ წერილობით ეცნობება მის განმთავსებელ სუბიექტს - "პატრიოტთა ალიანსს".
კიდევ ერთხელ გიხდით ბოდიშს“,-წერს ნიკა გვარამია.
მოგესალმებათ საინფორმაციო სააგენტო GUARDIANGE-ის ადმინისტრაცია და გაცნობებთ, რომ სააგენტოს განახლების შედეგად, ამიერიდან ვებგვერდის ძველ ვერსიაზე -WWW.GUARDIAN.GE ხელმისაწვდომი იქნება 2023 წლის 7 სექტემბრამდე განთავსებული საინფორმაციო ხასიათის წერილობითი/ფოტო/ვიდეო მასალა, ხოლო განახლებული სააგენტოს ვებგვერდს შეგიძლიათ გაეცნოთ WWW.GUARDIANGE.COM-ზე.
ამერიკის შეერთებული შტატების არჩეულმა პრეზიდენტმა დონალდ ტრამპმა ჯანდაცვისა და სოციალური მომსახურების მდივნად ვაქცინაციის მიმართ სკეპტიკურად განწყობილი რობერტ ფიცჯერალდ კენედი უმცროსი, პრეზიდენტ ჯონ კენედის ძმისშვილი დაასახელა, რითაც დაასრულა დიდი ხნის მითქმა-მოთქმა კენედის გარშემო იმის შესახებ, თუ რა თანამდებობას დაიკავებდა იგი ტრამპის ადმინისტრაციაში.