ამერიკელი კონგრესმენები, ადამ კინზინგერი და დანკენ ჰანტერი აშშ-ის წარმომადგენელთა პალატის წინაშე საქართველოს ტერიტორიული მთლიანობისა და სუვერენიტეტის მხარდაჭერის შესახებ მიღებული რეზოლუციის თაობაზე სიტყვით წარსდგნენ.

კერძოდ კი საქართველოს საგარეო საქმეთა სამინისტროს ცნობით, აშშ-ს კონგრესის წარმომადგენელთა პალატაში სიტყვით გამოსვლისას, ილინოისის შტატის კონგრესმენმა, ადამ კინზინგერმა რეზოლუციას მტკიცე მხარდაჭერა გამოუცხადა და საკუთარ გამოსვლაში ხაზი გაუსვა საქართველოს მიღწევებს დემოკრატიული განვითარების კუთხით.

მისი თქმით, საქართველოს განვითარება რეგიონისთვის მძლავრ მაგალითს წარმოადგენს.

საკუთარ გამოსვლაში კონგრესმენმა დაგმო რუსეთის ფედერაციის მხრიდან საქართველოს ტერიტორიების ოკუპაცია. კონგრესმენის თქმით, მომავალში რუსეთისგან მომავალი აგრესიის თავიდან ასაცილებლად უაღრესად მნიშვნელოვანია აშშ-ს მხრიდან რეგიონში მისი დემოკრატიული მოკავშირეების მხარდაჭერა.

მან ასევე ხაზი გაუსვა აშშ-ს მხრიდან მტკიცე გზავნილების გაჟღერების მნიშვნელობას და საქართველოს სუვერენიტეტსა და ტერიტორიულ მთლიანობას მხარდაჭერა გამოუცხადა.

„ჩვენ არასოდეს ვაღიარებთ საქართველოს ტერიტორიების ოკუპაციას და გავაგრძელებთ მოვუწოდოთ რუსეთს ფედერაციას გაიყვანოს ჯარები აფხაზეთისა და ცხინვალის რეგიონის ოკუპირებული რეგიონებიდან“, - განაცხადა ადამ კინზინგერმა.

კალიფორნიის შტატის კონგრესმენმა, დანკენ ჰანტერმა კი ორ ქვეყანას შორის არსებულ მეგობრობასა და პარტნიორობაზე გაამახვილა ყურადღება და მტკიცე მხარდაჭერა გამოუცხადა საქართველოს სუვერენიტეტსა და ტერიტორიულ მთლიანობას. დანკენ ჰანტერმა ქართველ ხალხს 25-წლიანი დამოუკიდებლობის პერიოდში დემოკრატიული და ეკონომიკური რეფორმების წარმატებით გატარება მიულოცა.

კონგრესმენმა ხაზი გაუსვა აშშ-სა და საქართველოს სტრატეგიულ პარტნიორობას და განსაკუთრებით გამოყო ორ ქვეყანას შორის უსაფრთხოების სფეროში არსებული თანამშრომლობა. მისი შეფასებით, თავდაცვის სფეროში აშშ-სა და საქართველოს მჭიდრო თანამშრომლობა უზრუნველყოფს უსაფრთხოებას როგორც რეგიონში, ისე გლობალურად და ხელს უწყობს საქართველოს თავდაცვისუნარიანობის ზრდას.

კონგრესმენმა ასევე ხაზი გაუსვა საერთაშორისო მისიებში საქართველოს შეიარაღებული ძალების მონაწილეობის მნიშვნელობას.

წარმომადგენელთა პალატაში სიტყვით გამოსვლისას, კონგრესმენმა შეშფოთება გამოთქვა რუსეთის მიერ 2008 წლის ცეცხლის შეწყვეტის შეთანხმებით გათვალისწინებული ვალდებულებების შეუსრულებლობის გამო.

„შეშფოთებული ვარ, რომ რუსეთი განაგრძობს აფხაზეთისა და ცხინვალის რეგიონის ოკუპაციას და მიმაჩნია, რომ მოსკოვმა უნდა შეასრულოს 2008 წლის ცეცხლის შეწყვეტის შეთანხმებით გათვალისწინებული ვალდებულებანი. აშშ-ს მხარდაჭერა საქართველოს სუვერენიტეტისადმი ურყევია, ისევე როგორც ჩვენი მხარდაჭერა საქართველოს ნატო-სა და ევროკავშირში გაწევრიანებისადმი“, - განაცხადა დანკენ ჰანტერმა.

2016 წლის 9 აგვისტოს აშშ-ის კონგრესის წარმომადგენელთა პალატამ საქართველოს ტერიტორიული მთლიანობის მხარდამჭერი ორპარტიული რეზოლუცია (H.Res. 660) აბსოლუტური უმრავლესობით მიიღო. სახელობითი კენჭისყრის შედეგად რეზოლუციას წარმომადგენელთა პალატის 410-მა წევრმა დაუჭირა მხარი, 6-ის წინააღმდეგ.