„ჩემი აზრით დადგება ის მომენტი, როცა საქართველოს ხელისუფლება აღიარებს სამხრეთ ოსეთსა და აფხაზეთს მეზობელ ქვეყნებად“, განაცხადა რუსეთის საგარეო საქმეთა მინისტრის მოადგილემ გრიგორი კარასინმა პრაღაში ზურაბ აბაშიძესთან გამართული შეხვედრის დასრულების შემდეგ ქართველ ჟურნალისტებთან საუბრისას.

„ვერ ვიტყვი, რომ ამის ნიშნები არის, მაგრამ საჭიროა ხედავდე პერსპექტივას, რადგან სხვა ყველაფერი აბსოლუტურად უპერსპექტივოა. რუსეთი ყოველთვის უჭერდა მხარს პირდაპირი დიალოგის დაწყებას, ამიტომ ჩვენ 2008 წლის ოქტომბერში გავხდით ჟენევის დისკუსიების მონაწილენი. ეს ერთადერთი მოედანია, სადაც საქართველოს, აფხაზეთისა და სამხრეთ ოსეთის წარმომადგენლები პირისპირ საუბრობენ პრობლემებზე. დიალოგი აიგო და უკვე იქცა ტრადიციად, რომელსაც ძალიან უნდა მოვუფრთხილდეთ“, თქვა კარასინმა.

რუსმა დიპლომატმა ამავე დროს რუსეთ-საქართველოს ურთიერთობების გაჯანსაღების პერსპექტივაზეც ისაუბრა და აღნიშნა, რომ ამ მხრივ ოპტიმიზმის საფუძვლები არსებობს.

„რაც შეეხება ჩვენი შეხვედრის ფორმატს. ბოლო წლებში, ერთობლივი ძალისხმევის წყალობით ორივე ქვეყანაში მოიმატა იმ ადამიანების რიცხვმა, ვინც ოპტიმიზმით განეწყო საქართველო-რუსეთის ურთიერთობებისადმი. ჩვენ შორს წავედით იმ კონფრონტაციისგან, რომელსაც ბატონი სააკაშვილი ქადაგებდა და მივედით დასკვნამდე, რომ რთულ პირობებშიც კი უნდა შევძლოთ ურთიერთობების, თანამშრომლობის გაღრმავება“, დასძინა გრიგორი კარასინმა.