„ჩვენ კარგა ხანია ვამბობთ იმას, რომ მზად ვართ აფხაზებთან და ოსებთან დავიწყოთ პირდაპირი დიალოგი“, განაცხადა საქართველოს პრემიერ-მინისტრის სპეციალურმა წარმომადგენელმა რუსეთთან ურთიერთობებში ზურაბ აბაშიძემ პრაღაში გრიგორი კარასინთან გამართული მოლაპარაკებების დასრულების შემდეგ.

აბაშიძემ აფხაზებთან და ოსებთან პირდაპირი დიალოგის დაწყებაში რუსულ ფაქტორზე გაამახვილა ყურადღება და აღნიშნა: „თუ რუსეთის მხარე ამას ხელს შეუწყობს, ჩვენ ამას შევამჩნევთ და დავინახავთ, მაგრამ აქამდე ეს ასე არ ყოფილა. წლების განმავლობაში ამბობენ ერთს და აკეთებენ მეორეს. ჩვენ ხაზგასმით დავადასტურეთ ის, რომ მხარს ვუჭერთ ჟენევის ფორმატს, როგორც ყველაზე მნიშვნელოვან საერთაშორისო ინსტრუმენტს, აფხაზეთისა და ოსეთთან დაკავშირებული პრობლემატიკის განსახილველად, უსაფრთხოების სფეროში, ჰუმანიტარულ სფეროში“, განაცხადა ზურაბ აბაშიძემ.