„ყოველთვის მიდიოდა საუბრები იმაზე, რომ სამეგრელოში იქმნებოდა რაღაც სპეციალური ჯგუფები იმისთვის, რომ ქვეყანაში არეულობები მოეწყოთ“,-განაცხადა „ქართული ოცნების“ გენერალურმა მდივანმა, კახა კალაძემ ჟურნალისტებთან საუბრისას.

ერთ-ერთი ჟურნალისტი დაინტერესდა შესაძლოა თუ არა, საქართველოს ტერიტორიაზე საბრძოლო მასალისა და ცეცხლსასროლი იარაღის მარაგის აღმოჩენა კავშირში იყოს გავრცელებულ აუდიოჩანაწერის შინაარსთან, რომელშიც სავარაუდოდ, „ნაციონალური მოძრაობის“ ლიდერები რევოლუციურ სცენარს განიხილავენ.

„ვერ გეტყვით მიმდინარეობს გამოძიება. ჩვენ თუ გავიხსენებთ, ყოველთვის მიდიოდა საუბრები იმაზე, რომ სამეგრელოში იქმნებოდა რაღაც სპეციალური ჯგუფები იმისთვის, რომ ქვეყანაში არეულობები მოეწყოთ. რამდენიმე წლის წინ ამასთან დაკავშირებით ძალიან აქტიურად მიდიოდა საუბარი, რომ არის ძალიან დიდი რაოდენობით იარაღი დამალული. დაველოდოთ გამოძიებას. თუ რაიმე სახის თანხვედრა იქნება ამ ორ საქმესთან დაკავშირებით, გამოძიება დაადგენს“, - განაცხადა კალაძემ.

დღეს  ცნობილი გახდა, რომ შინაგან საქმეთა სამინისტრომ, სახელმწიფო უსაფრთხოების სამსახურთან და მთავარ პროკურატურასთან ერთად, ოპერატიული ინფორმაციის საფუძველზე ჩატარებული საგამოძიებო მოქმედებების შედეგად, საქართველოს ტერიტორიაზე, საბრძოლო მასალისა და ცეცხლსასროლი იარაღის მარაგს მიაკვლია.  

კერძოდ, კი უწყების ცნობით, სხვადასხვა გეოგრაფიული ადგილმდებარეობიდან ამოღებული იქნა დიდი ოდენობით ცეცხლსასროლი იარაღი, საბრძოლო მასალა, ფეთქებადი ნივთიერებები და ასაფეთქებელი მოწყობილობები. გამოძიებამ დაადგინა, რომ აღნიშნული საბრძოლო მასალის შენიღბულად დამარხვა 2009-2011 წლების განმავლობაში განხორციელდა.   

გამოძიება ცეცხლსასროლი იარაღის, საბრძოლო მასალის, ფეთქებადი ნივთიერების და ასაფეთქებელი მოწყობილობის მართლსაწინააღმდეგო შეძენა-შენახვის ფაქტზე, საქართველოს სისხლის სამართლის კოდექსის 236-ე მუხლის მე-2 ნაწილით მიმდინარეობს.