„დამატებით გვესაჭიროებოდა 1-მილიონიანი სესხის აღება იმისათვის, რომ დამატებითი მიმდინარე კამპანიის ხარჯები დაგვეფარა ამ სესხის საშუალებით”, -განაცხადა „ქართული ოცნების“ აღმასრულებელმა მდივანმა, ირაკლი კობახიძემ, "ქართულმა ოცნების" მიერ "ბანკი ქართუდან" მილიონი ლარის ოდენობის სესხის აღების შესახებ საუბრისას.

როგორც ირაკლი კობახიძემ ჟურნალისტებს განუცხადა, „ქართულ ოცნებას” აქვს დაფინასების სხვა წყაროებიც, თუმცა ძირითადი არის შემოწირულობები.

„აქ საუბარია ჩვეულებრივ სესხზე, კანონმდებლობის შესაბამისად. სწორედ მილიონის ფარგლებში იძლევა კანონმდებლობა საარჩევნო სუბიექტებისთვის სესხის აღების შესაძლებლობას. ჩვენ ავიღეთ ეს სესხი, ჩვეულებრივი საბაზრო განაკვეთით, 11%-იანი საპროცენტო განაკვეთით. აქედან გამომდინარე, ყველაფერი არის სრულ შესაბამისობაში საქართველოს კანონმდებლობასთან“, - განაცხადა ირაკლი კობახიძემ.  

"ქართული ოცნების" მიერ "ქართუდან" სესხის აღება 9 სექტემბერს მოხდა. აღნიშნული ფინანსური დოკუმენტაცია სახელმწიფო აუდიტის სამსახურის ვებ-გვერდზეა გამოქვეყნებული.  მისი დაფარვის ვადა 4 თვე, წლიური საპროცენტო განაკვეთი კი 11 %-ია. სესხის უზრუნველყოფად მითითებულია საქართველოს საარჩევნო კოდექსის 56-ე მუხლის პირველი ნაწილი, რაც თავის მხრივ იმ პარტიების მიერ მილიონ ლარამდე გაწეული ხარჯების სახელმწიფოს მიერ ანაზღაურებას გულისხმობს, რომელმაც საარჩევნო ბარიერი გადალახა.