თბილისში შემოყვანილი Man-ის 10 ახალი ავტობუსი უახლოეს დღეებში ბაგებიდან ორბელიანის მოედნის მიმართულებით მოძრავ N61 ავტობუსის ხაზზე დაინიშნება, აქამდე აღნიშნულ მარშრუტზე მოძრავი ავტობუსები კი სხვა ხაზებზე გადანაწილდება.

დედაქალაქის მერიის ცნობით, თბილისელებს და დედაქალაქის სტუმრებს 10 ახალი, ევროსტანდარტების შესაბამისი, ადაპტირებული და ეკოლოგიურად სუფთა, CNG საწვავზე [CNG ერთ-ერთი ყველაზე ეფექტური და სუფთა საწვავია. წვის დროს თითქმის არ გამოიყოფა ნახშიროჟანგი და მისი აორთქლება არ აზიანებს ოზონის შრეს, რის გამოც მიჩნეულია ეკოლოგიურად ყველაზე სუფთა საწვავად] მომუშავე ავტობუსი მოემსახურება. 

ახალი ავტობუსების დედაქალაქში ჩამოსვლასთან დაკავშირებით, დღეს, სასტუმრო „რადისონი“-ს მიმდებარე ტერიტორიაზე თბილისის მერი დავით ნარმანია საკრებულოს თავმჯდომარესთან, გიორგი ალიბეგაშვილთან, ევროპის რეკონსტრუქციისა და განვითარების ბანკისა (EBRD) და კომპანია Man Truck and Bus AG-ის წარმომადგენლებთან ერთად იმყოფებოდა.

თბილისის მერმა ადგილზე შეკრებილ საზოგადოებას ახალი ავტობუსები წარუდგინა და სიტყვით მიმართა, რის შემდეგაც ავტობუსებმა, სიმბოლურად, პირველი, მოკლე მარშრუტი შეასრულეს.  

„დღეს პირველი 10 ავტობუსი ჩამოვიდა და მზად არის. ავტობუსები უახლოეს  რამდენიმე დღეში უკვე გავლენ N61 მარშრუტზე და დაიწყებენ მგზავრთა გადაყვანას. მძღოლები  მომზადებულები არიან, თუმცა, შემდეგი რამდენიმე დღე, მათ მაინც ჩაუტარდებათ დამატებითი სწავლება. მძღოლებს  სპეციალური ფორმები ექნებათ, სათანადოდ აღჭურვილები იქნებიან იმისათვის, რომ შეძლონ თანამედროვე ავტობუსების მართვა და მგზავრების მომსახურება“, – განაცხადა დავით ნარმანიამ.

დედაქალაქის მერიის ცნობით, თებერვლის ბოლომდე, თბილისის ავტოპარკი ეტაპობრივად 143 ერთეული ავტობუსით განახლდება.

„თბილისის მერიამ ავტობუსების პარკის შესწავლა გასულ წელს დაიწყო და დღის წესრიგში დადგა ავტოპარკის განახლების საჭიროება. შესაბამისად, დაიწყო აქტიური კომუნიკაცია  ევროპის რეკონსტრუქციისა და განვითარების ბანკთან,  EBRD-ის დახმარებით ჩატარდა წინასწარი კვლევა, რომელმაც აღწერა თბილისის ავტობუსების პარკში არსებული მდგომარეობა და ასევე, პარკის განახლების შესაძლებლობები, რის შემდეგაც გამოცხადდა ტენდერი და გაიმარჯვა გერმანულმა კომპანია Man Truck and Bus AG-მა.

ავტოპარკის განახლების პროექტი EBRD-ის ფინანსური და ტექნიკური მხარდაჭერით ხორციელდება. EBRD-ის სასესხო რესურსმა 27 მლნ ევრო შეადგინა, ხოლო ევროკავშირის მიერ დაფუძნებულმა ფონდმა - E5P-მ 7 მლნ ევროს ოდენობის გრანტი გამოყო.

10 ახალი ავტობუსი ბაგებიდან ორბელიანის მოედნის მიმართულებით მოძრავ N61 ავტობუსის ხაზზე დაინიშნება, აქამდე აღნიშნულ მარშრუტზე მოძრავი ავტობუსები კი სხვა ხაზებზე გადანაწილდება, რაც ქალაქში მუნიციპალური ტრანსპორტის გადაადგილებებს შორის ინტერვალს შეამცირებს და მგზავრობას უფრო კომფორტულს გახდის. მეორე ეტაპზე კი ახალი ავტობუსები N51 ხაზს დაემატება. 

თბილისის მერიას ავტოპარკის განახლების 4 წლიანი გეგმა აქვს“,-აცხადებენ მერიაში.