თბილისის შოთა რუსთაველის სახელობის საერთაშორისო აეროპორტთან რომის პაპის საქართველოში ვიზიტის საწინააღმდეგოდ აქცია მიმდინარეობს.

რომის პაპის ჩამოსვლას "მართლმადიდებელ მშობელთა კავშირის" წევრები და რამდენიმე სასულიერო პირი აპროტესტებს.

ისინი ამბობენ, რომ რომის პაპის ფრანცისკე აგრესორია და არ დაუშვებენ მის თავისუფალ გადაადგილებას საქართველოში.

აქციის მონაწილეები აპროტესტებენ რომის პაპის მიერ საქართველოში დაგეგმილ წირვასაც.

„ვაპროტესტებთ იმიტომ, რომ პაპი ჩამოდის სულიერი, სამოციქულო მისიით იმისათვის, რომ იქადაგოს რაც ჩვენთვის, მართლმადიდებლებისთვის მიუღებელია. ეწევა პროზელიტურ საქმიანობას, ატარებს მესას სტადიონზე, უნდა შესვლა სვეტიცხოველში“, - განაცხადა დეკანოზმა, დავით ისაკაძემ და დასძინა, რომ პაპი შეეცდება, ეკლესიურად გაუნათლებელი მართლმადიდებელი ადამიანები გადაიბიროს.

საქართველოში რომის პაპის, ფრანცისკეს ვიზიტი დაიწყო. დღეს რომის პაპი პრეზიდენტის სასახლეში პირისპირ შეხვედრას გამართავს გიორგი მარგველაშვილთან და საპატრიარქოში - საქართველოს კათოლიკოს-პატრიარქთან ილია მეორესთან. პრეზიდენტის სასახლეში საქართველოს პრეზიდენტი და რომის პაპი 300-მდე მოწვეულ სტუმარს სიტყვით მიმართავენ, რომელთა შორისაც არიან აღმასრულებელი, საკანონმდებლო და სასამართლო ხელისუფლების, საერთაშორისო ორგანიზაციების, დიპლომატიური კორპუსის, საპატრიარქოს და სხვადასხვა რელიგიური კონფესიების და საზოგადოების წარმომადგენლები.   

1-ელ ოქტომბერს, რომის პაპი თბილისის მიხეილ მესხის სახელობის სტადიონზე მესას აღავლენს და მესაზე დამსწრე საზოგადოებას ქადაგებით მიმართავს. თბილისში მყოფი რომის პაპი ასევე გამართავს შეხვედრებს ასირიულ-ქალდეურ საზოგადოებასთან თბილისის სიმონ ბარ-საბას სახელობის ასირიულ-ქალდეურ კათოლიკურ ეკლესიაში, საქართველოში კათოლიკური ეკლესიის წარმომადგენლებთან თბილისის ღვთისმშობლის ზეცად აღყვანების კათოლიკურ ეკლესიაში და კამილიელი მამების სახელობის ცენტრში.    

ვიზიტის დასასრულს, რომის პაპი სრულიად საქართველოს კათოლიკოს - პატრიარქთან და თანმხლებ პირებთან ერთად მცხეთაში, სვეტიცხოვლის საკათედრო ტაძარს მონახულებს და ტაძარში მისასალმებელ სიტყვას წარმოთქვამს. 2 ოქტომბერს რომის პაპი ფრანცისკე თბილისიდან აზერბაიჯანში გაემგზავრება.