საქართველოს საკონსტიტუციო სასამართლომ ტელეკომპანია „რუსთავი 2“-სა და შპს „ტელეკომპანია საქართველოს“ საკონსტიტუციო სარჩელი დააკმაყოფილა.

საქმე ეხება სამაუწყებლო კომპანიაში დროებითი მმართველის დანიშვნის შესახებ დაუყოვნებლივი აღსრულების საკითხს, რომლის შესახებაც გადაწყვეტილება საქალაქო სასამართლოს მოსამართლე თამაზ ურთმელიძემ გამოიტანა.

სწორედ ამ ნორმის არაკონსტიტუციურად ცნობას ითხოვდა „რუსთავი 2“.

კერძოდ კი საკონსტიტუციო სასამართლომ არაკონსტიტუციურად სცნო სამოქალაქო საპროცესო კოდექსის 268-ე მუხლის პირველი მუხლის, ზ ქვეპუნქტის ის ნორმატიული შინაარსი, რომელიც სადაო ქონების საკუთრებაში გადაცემის შესახებ სასამართლო გადაწყვეტილების დაუყოვნებლივ აღსრულებას ითვალისწინებს.

ასევე არაკონსტიტუციურად იქნა ცნობილი ამავე კოდექსის 269-ე მუხლი, მეორე წინადადების ის ნორმატიული შინაარსი, რომელიც სამოქალაქო საპროცესო კოდექსის 268-ე მუხლის პირველი მუხლის, ზ ქვეპუნქტის საფუძველზე, დაუყოვნებლივი აღსრულების საკითხის ზეპირი მოსმენის გარეშე განხილვასა და გადაწყვეტას ითვალისწინებს.

საკონსტიტუციო სასამართლოს გადაწყვეტილების თანახმად, საქართველოს კონსტიტუციის 21-ე მუხლის პირველ და მეორე პუნქტებთან მიმართებით, არაკონსტიტუციურად იქნა ცნობილი ასევე სარჩელის გადაწყვეტილების უზრუნველყოფის ღონისძიების გამოყენების გათვალისწინება იმ პირობებში, როდესაც ამ ღონისძიების შედეგად დაცული სიკეთე, არ აღემატება უზრუნველყოფის ღონისძიების გამოყენების შედეგად მოწინააღმდე მხარისთვის მიყენებულ ზიანს.

საკონსტიტუციო სასამართლოს პირველმა კოლეგიამ კანონის ეს ნორმა 2015 წლის 13 ნოემბერს შეაჩერა თუმცა, გადაწყვეტილება დღემდე არ იყო მიღებული.

თბილისის საქალაქო სასამართლომ ტელევიზიის წილები ქიბარ ხალვაშს მიაკუთვნა.