"ერთიანი ნაციონალური მოძრაობის" წევრის, რომან გოცირიძის განცხადებით, "ქართული ოცნების" საარჩევნო პროგრამა ფარატინა ფურცელია.

პარტიის ცნობით, დღეს გამართულ ბრიფინგზე გოცირიძემ განაცხადა, რომ საარჩევნო პროგრამა სიცრუით არის სავსე.

„საქართველოს კანონმდებლობის შესაბამისად, მთავრობამ პარლამენტში სახელმწიფო ბიუჯეტი წარადგინა. მას თან ახლავს ქვეყნის განვითარების ძირითადი ეკონომიკური და ფინანსური ინდიკატორები მომდევნო ოთხი წლის განმავლობაში. ამ ორი დოკუმენტის ურთიერთშედარებისას ნათლად ჩანს, რომ “ქართული ოცნების” საარჩევნო პროგრამა ფარატინა ქაღალდია. “ოცნების” მთავრობის ბიუჯეტი სიცრუეში ამხელს “ოცნების” მთავრობის საარჩევნო პროგრამას. ამ ორი დოკუმენტის ურთიერთშედარებისას ნათლად ჩანს, რომ “ქართული ოცნების” საარჩევნო პროგრამა არის ფარატინა ქაღალდი. იგი არის არარეალისტური დოკუმენტი, ტრადიციულად გაჯერებული ცრუ დაპირებებით. პროგრამით ნაკისრი ვალდებულებების უდიდესი ნაწილის შესრულება ნავარაუდევია ქვეყნის ბიუჯეტიდან, თუმცა მთავრობის მიერ წარმოდგენილ დოკუმენტში ამ დაპირებების უდიდესი ნაწილი არ არის გათვალისწინებული.

მთავრობის მიერ წარმოდგენილი დოკუმენტების მიხედვით, ქვეყნის მომავალი გამოიყურება ძალზე უპერსპექტივოდ. ეკონომიკური ზრდა მომავალ 2017 წელს გათვალისწინებულია 4 პროცენტის ოდენობით, ხოლო საშუალოდ ოთხი წლის განმავლობაში 4, 6 პროცენტის ფარგლებში. 

მთავრობა არ აპირებს: პენსიების ზრდას, მასწავლებლების ხელფასების მატებას, ჯანდაცვის პაკეტში მედიკამენტების გათვალისწინებას, გადასახადების შემცირებას, ინფრასტრუქტურის განცითარებას იმ ტემპით, რაც პროგრამაშია მოცემული, ბიუროკრატიული და არაეფექტიანი ხარჯების შემცირებას და უამრავ სხვას, რაც დაპირდა საარჩევნო პროგრამით და არ ჩანს არც ბიუჯეტში და არც ეკონომიკური განვითარების პერსპექტივაში. ყოველივე ამას ჰპირდება ”ნაციონალური მოძრაობა” და ჩვენ შევასრულებთ ჩვენს დანაპირებს”, - აღნიშნა რომან გოცირიძემ.