ქალაქ ზუგდიდში „ქართული ოცნების“ მაჟორიტარი დეპუტატობის კანდიდატის, მერაბ ქვარაიას განცხადებით, ბოლო ერთი კვირის განმავლობაში „ნაციონალური მოძრაობისგან“ მოსალოდნელია პროვოკაციები.

აღნიშნულით მერაბ ქვარაია ზუგდიდის სოფელ დიდინეძში გუშინ მომხდარ ინციდენტს საგანგებოდ გამართულ ბრიფინგზე გამოეხმაურა.

მან მმართველი პარტიის მხარდამჭერებსა და წევრებს მოუწოდა, არ აჰყვნენ “ნაციონალური მოძრაობის” პროვოკაციებს.

„ნაციონალურმა მოძრაობამ“ კიდევ ერთხელ დაგვანახა, რომ ის აგრძელებს ჩვეულ საქმიანობას, ძალადობას. სოფელ დიდინეძში „ქართული ოცნების“ ახალგაზრდული ფრთის წარმომადგენლები ატარებდნენ წინასაარჩევნო კამპანიას, რამაც გააღიზიანა „ნაციონალური მოძრაობის“ წარმომადგენლები. ისინი თავს დაესხნენ ამ ახალგაზრდებს, სასტიკად გაუსწორდნენ მათ. ნაცემია სამი ახალგაზრდა, მათ შორის სასტიკად ნაცემია 19 წლის გოგონა, რომელიც უგონო მდგომარეობაში გადაიყვანეს საავადმყოფოში. ორ მათგანს აქვს თავის ტვინის შერყევა. მათ ამჟამად მკურნალობენ. გვინდა კიდევ ერთხელ მოვუწოდოთ „ქართული ოცნების“ მხარდამჭერებს, ჩვენს ახალგაზრდებს, რომ არანაირად არ აჰყვეთ მსგავს პროვოკაციებს, რომელიც მოსალოდნელი იქნება და შესაძლოა უფრო ხშირი გახდეს ამ ერთი კვირის განმავლობაში. „ქართული ოცნება“ და საქართველოს ხელისუფლება გააკეთებს ყველაფერს, რომ ჩვეულ, მშვიდ გარემოში გაგრძელდეს არჩევნები და დასრულდეს ის ასევე ჩვეულ, მშვიდ გარემოში 8 ოქტომბერს „ქართული ოცნების“ გამარჯვებით“,-განაცხადა მერაბ ქვარაიამ.

ზუგდიდის საავადმყოფოს ექიმ ნინო მგალობლიშვილის განცხადებით, სოფელ დიდინეძში დაშავებულ გოგონას თავის არეში მიყენებული დაზიანების გარდა, ყელზე ნაჭდევებიც აღენიშნება. მისი თქმით, საავადმყოფოში შემთხვევის შედეგად დაშავებული სამი ახალგაზრდა შეიყვანეს, რომელთა მდგომარეობა ამჟამად სტაბილურია.

„ორს აღენიშნება თავის ტვინის შერყევა, ერთს კი თავის ზედაპირული ტრავმა. სამივეს მდგომარეობა სტაბილურია. ორი მათგანი მკურნალობას სტაციონარში აგრძელებს, ერთი გაეწერება ბინაზე. გოგონა უგონო მდგომარეობაში არ შემოუყვანიათ. ადგილზე ჰქონდა რამდენჯერმე გონის კარგვა და ასევე ადგილი ჰქონდა მცირე ამნეზიასაც, რადგან გარკვეული მომენტები არ ახსოვს. მას ყელზე აღენიშნება ორმხრივი ნაჭდევი“, - განაცხადა ნინო მგალობლიშვილმა.

„ქართული ოცნების“ წარმომადგენელის, მერი შენგელაიას განცხადებით, „ქართული ოცნების“ ახალგაზრდული ფრთის სამი წევრი სოფელ დიდინეძში მაშინ სცემეს, როდესაც პარტიულ ფლაერებს არიგებდნენ. მისი ცნობით, ნასვამ მდგომარეობაში მყოფი „ნაციონალური მოძრაობის“ აქტივისტები ახალგაზრდებს ფიზიკურად გაუსწორდნენ.

განსხვავებულ ვერსიაზე საუბრობს „ნაციონალური მოძრაობა“. პარტიის ინფორმაციით, ზუგდიდის სოფელ დიდინეძში, „ერთიანი ნაციონალური მოძრაობის“ შტაბის უფროსს პაპუნა კუკავას, „ქართული ოცნების“ ახალგაზრდული ორგანიზაციის წარმომადგენლებმა ფიზიკური და სიტყვიერი შეურაცხყოფა მიაყენეს. მათივე ინფორმაციით, გუშინ კუკავა ოჯახთან ერთად მანქანით გადაადგილდებოდა, ქუჩაში მოძრაობა „ქართული ოცნების“ 20-მდე მხარდამჭერს პრაქტიკულად გადაკეტილი ჰქონდა, კუკავამ მათ გატარება სთხოვა, რასაც მათი მხრიდან სიტყვიერი შეურაცხყოფა მოჰყვა.

„ხმაურზე კუკავას მეზობლები გამოვიდნენ. ორმხრივ ჩხუბში დაზიანდა ენმ-ის მხარდამჭერის ავტომობილი. ამ დროისათვის პოლიციას განყოფილებაში გადაყვანილი ჰყავს „ნაციონალური მოძრაობის“ დიდინეძის შტაბის უფროსი პაპუნა კუკავა და მისი მეზობელი მანუჩარ ქირია. „ერთიანი ნაციონალური მოძრაობა“ მიიჩნევს, რომ ეს არის კარგად დაგეგმილი პრვოკაცია „ქართული ოცნების“ მხრიდან, რომელსაც ხელმძღვანელობს გუბერნატორი ლევან შონია, „ოცნების“ მაჟორიტარი კანდიდატი ედიშერ თოლორაია და „ქართული ოცნების“ გამგებლობის კანდიდატი ლაშა გოგია. ასეთი აგრესიული ქმედება ახასიათებს „ქართულ ოცნებას“, ისინი გრძნობენ, რომ ზუგდიდში პირწმინდად წაგებული აქვთ არჩევნები და პროვოკაციული მოქმედებებით ცდილობენ შეინარჩუნონ ხელისუფლება, რაც მათ არ გამოუვათ“, - ნათქვამია „ნაციონალური მოძრაობის“ მიერ გავრცელებულ ინფორმაციაში.