ხობის მუნიციპალიტეტში „ქართული ოცნების“ მაჟორიტარი დეპუტატობის კანდიდატის, ირაკლი (დაჩი) ბერაიას განცხადებით, „ქართულ ოცნებას“ ქვეყანაში დესტაბილიზაცია არ აწყობს.

ამის შესახებ მან Guardian.ge-სთან საუბრისას აღნიშნა, რითაც „ნაციონალური მოძრაობის“ განცხადებას გამოეხმაურა, რომლის მიხედვითაც, ზუგდიდის მუნიციპალიტეტის სოფელ დიდინეძში გუშინ მომხდარი ინციდენტის დროს „ქართული ოცნების“ წევრები დაესხნენ თავს „ნაციონალურ მოძრაობის“ წარმომადგენლებს.

ირაკლი ბერაიას  თქმით, „ქართული ოცნება“ არჩევნებში დამაჯერებლად მიაღწევს გამარჯვებას, მათ შორის სამეგრელოშიც.

„თუ ვინმეს არ აწყობს ეს დესტაბილიზაცია, არ აწყობს  „ქართულ ოცნებას“. „ქართული ოცნება“ არჩევნებში დამაჯერებლად  მიაღწევს გამარჯვებას, მათ შორის სამეგრელოშიც“,-განაცხადა ირაკლი ბერაიამ.

ირაკლი ბერაია დღეს დილით, გამთენიისას „ქართული ოცნების“ წარმომადგენლებს და აქტივისტებს შეხვდა და ყველას მოუწოდა, რომ სიმშვიდე შეინარჩუნონ. 

„არ აჰყვეთ „ნაციონალური მოძრაობის” პროვოკაციებს. სიმშვიდის შენარჩუნებით დავადეკლარირებთ 8 ოქტომბრის გამარჯვებას“,-განაცხადა ირაკლი ბერაიამ.   

ზუგდიდის მუნიციპალიტეტის სოფელ დიდინეძში „ნაციონალური მოძრაობის“ მიერ „ქართული ოცნების“ ახალგაზრდული ორგანიზაციის ნაცემი წევრები საავდმყოფოში წუხელ, ხობის საკრებულოს თავმჯდომარემ, ედიშერ ჯობავამ, ხობში „ქართული ოცნების“ მაჟორიტარი დეპუტატობის კანდიდატმა, ირაკლი (დაჩი) ბერაიამ, შრომის, ჯანმრთელობის და სოციალური დაცვის მინისტრის პირველმა მოადგილემ, ვალერი კვარაცხელიამ, სამეგრელო-ზემო სვანეთის გუბერნატორმა, ლევან შონიამ და ხობის მუნიციპალიტეტის „ქართული ოცნების“ შტაბის ხელმძღვანელმა, ვარაზ გაბედავამ მოინახულეს.

ზუგდიდის რაიონში "ქართული ოცნებისა" და ენმ-ს წარმომადგენლებს შორის ფიზიკური და სიტყვიერი დაპირისპირება გუშინ მოხდა. „ქართული ოცნების“ ცნობით, ახალგაზრდული ფრთის სამი წევრი „ნაციონალური მოძრაობის“ ნასვამმა წევრებმა მაშინ სცემეს, როდესაც პარტიულ ფლაერებს არიგებდნენ.