„ყველა მასწავლებელი გმირია თუნდაც იმიტომ, რომ აირჩია ეს პროფესია. მე ვიქნები ყველა მასწავლებლის დამფასებელი", - აღნიშნული განცხადება განათლებისა და მეცნიერების მინისტრმა, ალექსანდრე ჯეჯელავამ გააკეთა.

ჯეჯელავა "ქართული ოცნების" აბაშა-მარტვილის მაჟორიტარი დეპუტატობის კანდიდატთან, ოთარ დანელიასთან ერთად, აბაშა-მარტვილის მუნიციპალიტეტში პედაგოგებს შეხვდა და სასწავლო დაწესებულებები დაათვალიერა.

„მომავალ წელს ავტობუსის მომსახურებით დამატებით 23 საჯარო სკოლა და 1500 მოსწავლე ისარგებლებს, გაგრძელდება სკოლების მშენებლობა, რეაბილიტაცია და სათანადო ინვენტარით აღჭურვა, სპორტული ინფრასტრუქტურის მოწყობა, ასევე, დაინერგება თავისუფალი გაკვეთილები, რაც სწავლების ინოვაციური და კრეატიული საშუალება იქნება და სასკოლო ცხოვრების განუყოფელი ნაწილი გახდება“, - განაცხადა ალექსანდრე ჯეჯელავამ.

მინისტრის თქმით, 2017 წლის 1-ლი იანვრიდან დაიწყება მასწავლებლების ხელფასის ზრდა, რაც 800-900 ლარს მიაღწევს.

მარტვილში ვიზიტის ფარგლებში, ალექსანდრე ჯეჯელავა და ოთარ დანელია სოფელ ნაგებერაოს ახალი საჯარო სკოლის პროექტს გაეცნენ, თანამედროვე ინფრასტრუქტურით აღჭურვილი კერძო სკოლა ,,სხივი“ და სოფელ ნაგვაზაოს სასოფლო-სამეურნეო ტექნიკუმი დაათვალიერეს. გარდა ამისა, მათ აბაშის მე-2 საჯარო სკოლა მოინახულეს.

„ყველა მასწავლებელი გმირია თუნდაც იმიტომ, რომ აირჩია ეს პროფესია. მე ვიქნები ყველა მასწავლებლის დამფასებელი. გახსნილი კომუნიკაცია არის ჩვენი რეფორმის დასაყრდენი. ვფიქრობ, რომ რამდენიმე წელიწადში თვისობრივად განსხვავებული ვითარება გვექნება განათლების სფეროში“, - განაცხადა ალექსანდრე ჯეჯელავამ აბაშაში პედაგოგებთან შეხვედრაზე.